ԵՐԵՎԱՆ, 27 օգոստոսի — Sputnik. ՀՀ քննչական կոմիտեի նախագահն այսօր կոլեգիայի անդամներին և ՔԿ ծառայողներին է ներկայացրել կոմիտեի նախագահի նորանշանակ տեղակալներին։
Այս մասին տեղեկացնում են Քննչական կոմիտեի լրատվական ծառայությունից:
Վարչապետ Նիկոլ Փաշինյանի որոշմամբ օգոստոսի 24-ին ՔԿ նախագահի տեղակալ են նշանակվել Արման Պողոսյանը, ՀՀ քննչական կոմիտեի նախագահի տեղակալ-զինվորական քննչական գլխավոր վարչության պետ՝ Արտակ Կրկյաշարյանը, ՀՀ ՔԿ նախագահի տեղակալ-ՀԿԳ քննության գլխավոր վարչության պետ՝ Սամվել Ավետիսյանը։
Շնորհավորելով նշանակման կապակցությամբ` Հայկ Գրիգորյանը նշել է. «Յուրաքանչյուրն ունի մասնագիտական հարուստ փորձ ու հմտություններ, բարոյական բարձր հատկանիշներ, որոնք, վստահ եմ, կծառայեցնեն Քննչական կոմիտեի առջև դրված խնդիրների, սահմանադրական գործառույթների կատարմանը»։
Նա շեշտել է, որ արդարադատության իրականացման հիմքը նախաքննության ընթացքում ձեռք բերված ապացույցներն են, և իրենց առաջնային խնդիրն է՝ հանցագործության յուրաքանչյուր դեպքով ողջամիտ ժամկետներում ապահովել բազմակողմանի և օբյեկտիվ քննության իրականացումը, ապացույցների պատշաճ ձեռք բերումը, որոնց համակցությամբ կտրվեն իրավական գնահատականներ։
Հայկ Գրիգորյանը կոմիտեի աշխատակիցներին հիշեցրել է, որ ինչպես զինվորներն են դիրքերում օրը 24 ժամ պաշտպանում սահմանները, այնպես էլ իրենք՝ որպես ոլորտի զինվորներ, պարտավոր են պատշաճ ծառայել ժողովրդին, պաշտպանել հանցագործությունից տուժած քաղաքացիների իրավունքները, ապահովել պատժի անխուսափելիությունը։