ԵՐԵՎԱՆ, 27 օգոստոսի — Sputnik. Սևանի մակարդակի բարձրացումը կանգնեցված է։ Այսօր լրագրողների հետ հանդիպմանը, մեկնաբանելով Սևանից լրացուցիչ ջրառի վերաբերյալ կառավարության նախագիծը, ասաց ջրային էկոհամակարգերի մասնագետ Սեյրան Մինասյանը:
Նրա խոսքով, Սևանի մասին օրենքի ընդունումից` 2012 թվականից ի վեր արդեն 3 անգամ Սևանա լճի մակարդակի բարձրացման բացասական բալանս է գրանցվել, ինչի համար որևէ մեկը պատասխան չի տվել:
«Հիմա հերթական ջրառի համար Ջրպետկոմը դիմել է կառավարություն և Ազգային ժողով: Սկզբում ուզում էին մինչև 80 միլիոն խմ ջրառ իրականացնել, հետո, կարծես, գտան ներքին ռեզերվներ, և հիմա 40 միլիոն խմ-ի մասին են խոսում»,- ասաց նա:
Մինչդեռ, մասնագետի համոզմամբ, այս տարի լրացուցիչ ջրառի կարիք ընդհանրապես պետք է չզգացվեր։
«Այս տարի ջրատվությունն այնքան է եղել, որ բոլոր ջրամբարների համար կարող էր ապահովվել 100 տոկոս լցվածություն: Օրինակ՝ Մարմարիկի ջրամբարից մարտի 14-ից ջուր են բաց թողել: Խնդրում եմ ասեք՝ մարտի կեսին Հրազդանում այդ ի՞նչ էին ջրում, որ ջրամբարը դատարկում էին»,- ասաց Մինասյանը:
Եվ այդուհանդերձ, մասնագետը չի ժխտում` որոշ գյուղատնտեսական տարածքներ այսօր իրապես ջրի կարիք ունեն, և այդ հարցը ստիպված պետք է լուծվի Սևանի հաշվին։
«Հանուն կայուն մարդկային զարգացման» ՀԿ-i նախագահ Կարինե Դանիելյանը Sputnik Արմենիայի հետ զրույցում չբացառեց, որ այս տարի Սևանից լրացուցիչ ջրառը ևս կարող է հանգեցնել լճում ջրի ավելացման բացասական բալանսի։
Իսկ լիճն արդեն իսկ վատ վիճակում է, կապույտ-կանաչ ջրիմուռներով ծաղկելը, ըստ Դանիելյանի, ոչ թե պատահականություն է, այլ «կյանքի ու մահվան սահմանին գտնվող, ճահճացող լճի ճիչը»։
Սևանա լճի մասին օրենքում ամրագրված 6 մետր բարձրացման անհրաժեշտությունը, Դանիելյանի դիտարկմամբ, լիճը ճահճացումից փրկելու նվազագույն պայմանն է։
«Մենք սկսեցինք բարձրացնել, և դա լավ է, բայց վերջին տարիներին անընդհատ տատանումներ ենք տալիս` մի փոքր բարձրացնում ենք, հետո իջեցնում, չնայած օրենքը դա թույլ չի տալիս, և դա խիստ բացասաբար է անդրադառնում լճի ջրի որակի վրա»,- ասաց նա։
Ինչ վերաբերում է լրացուցիչ 40 մլն խմ ջրառի վերաբերյալ կառավարության նախաձեռնությանը, որը վաղը կքննարկվի ԱԺ արտահերթ նիստում, Դանիելյանը կարծում է, որ նախագիծը կընդունվի։ Բայց հուսադրող է այն, որ հատուկ հանձնաժողովը վերահսկելու է ջրառը, ու եթե բավարարի 20 մլն խմ-ը, ջրառը հնարավոր է սահմանափակվի այդքանով։
Վաղը` օգոստոսի 28-ին, ժամը 11.00-ին, Ազգային ժողովը կգումարի արտահերթ նիստ, որի օրակարգում կառավարության առաջարկած «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին կառավարության առաջարկած նախագիծն է։
Դրանով կառավարությունն առաջարկում է օրենքով սահմանված 170 մլն խմ ջրառն ավելացնել և 40 մլն խմ-ով` պատճառաբանելով գյուղատնտեսական տարածքներում գրանցված ջրի դեֆիցիտը։