ԵՐԵՎԱՆ, 21 օգոստոսի — Sputnik. Պետք չէ խոսել «Ելք» դաշինքի ճեղքման մասին, թեև այդ կոալիցիայում ընդգրկված կուսակցությունները կմասնակցեն Երևանի Ավագանու ընտրությունների տարբեր դրոշների ներքո։ Այս մասին այսօր լրագրողներին ասաց ՀՀ արդարադատության նախարար Արտակ Զեյնալյանը։
Նշենք` «Ելք» դաշինքում երեք կուսակցություն կա` ՀՀ գործող վարչապետ Նիկոլ Փաշինյանի «Քաղաքացիական պայմանագիրը», Էդմոն Մարուքյանի գլխավորած «Լուսավոր Հայաստանը» և «Հանրապետությունը»` Արամ Սարգսյանի (հանգուցյալ վարչապետ Վազգեն Սարգսյանի եղբայրը) գլխավորությամբ։
«Քաղաքացիական պայմանագիրը» քաղաքապետի թեկնածու է առաջադրել հայտնի դերասան Հայկ Մարությանին, որն ակտիվորեն մասնակցում էր Փաշինյանի ցույցերին։ Իսկ մյուս երկու կուսակցությունները որոշել են առաջադրել Արտակ Զեյնալյանի թեկնածությունը։
Հարցին, թե ինչու է փորձառու իրավաբանը որոշել փոխել գործունեության ոլորտը, Զեյնալյանն ասաց. «Այսպես որոշեցին մեր երկու կուսակցությունները»։
Այնուամենայնիվ, նա ավելացրեց, «Ելքը» կա ու շարունակելու է գործել Ազգային ժողովում, քանի դեռ խորհրդարանը չի ցրվել:
Զեյնալյանն ավելացրեց, որ քարոզարշավի ընթացքում արձակուրդ կվերցնի ու չի կատարի արդարադատության նախարարի պարտականությունները, որպեսզի պաշտոնական ու քաղաքական շահերի բախում չլինի։
ՀՀ կառավարությունը ԱԺ արտահերթ ընտրությունները կանցկացնի մինչև 2019 թվականի մայիսը։ Երևանի ավագանու արտահերթ ընտրությունները տեղի կունենան սեպտեմբերի 23-ին:
Ավագանու ընտրություններին կմասնակցեն դերասան և պրոդյուսեր Հայկ Մարությանը («Քաղաքացիական պայմանագիր» կուսակցություն), Զարուհի Փոստանջյանը («Երկիր ծիրանի»), Արարատ Զուրաբյանը («ՀՀՇ»), հայտնի ճարտարապետ Արթուր Թարխանյանի դուստրը` Անահիտ Թարխանյանը, Նաիրա Զոհրաբյանը («ԲՀԿ»)։