ԵՐԵՎԱՆ, 17 օգոստոսի — Sputnik. «Britain's Got Talent» («Բրիտանիան տաղանդներ է փնտրում») հայտնի հեռուստաշոուի հաղթող Սիմոն Քերին մահացած են հայտնաբերել Լոնդոնի իր բնակարանում, հայտնում է Mirror-ը։
Նշվում է, որ 31 տարեկան կնոջը սպանել են Բաթերսի մեծահարուստների թաղամասում գտնվող տանը։
Ոստիկանություն են զանգահարել Քերի հարևանները, երբ նրա բնակարանից ճիչեր են լսել։ Դեպքի վայր ժամանած իրավապահները կոտրել են դուռը, բժիշկները փորձել են փրկել կնոջը, սակայն չեն հասցրել։ Դեպքի վայրում ձերբակալվել է 40-ամյա Դեսմոնդ Սիլվան։
Այժմ ոստիկանությունը պարզում է, թե նա ինչ կապ է ունեցել մահացածի հետ։
Քերը հայտնի էր դարձել «Britain's Got Talent» շոուի ժամանակ «B Positive» երգչախմբի կազմում մասնակցելու շնորհիվ։
Նա բուժքույր էր աշխատում հիվանդանոցի օնկոլոգիական բաժանմունքում։ Երգում էր երգչախմբում, որի կազմում մանգաղաձև բջջային անեմիա ունեցող հիվանդներ կան։ 2015 թվականին այդ հիվանդությունը խլել է նրա 6 տարեկան որդուն։ Քերը խոստովանել է, որ երգչախմբում երգելն օգնել է ուշքի գալ ողբերգությունից հետո։