ԵՐԵՎԱՆ, 17 օգոստոսի — Sputnik. Չմշկավազքի միջազգային միությունը (ISU) զրոյացրել է գեղասահքում գրանցված համաշխարհային բոլոր ռեկորդները։ Այդ մասին նշված է ISU-ի տարածած հաղորդագրությունում։
Ռուսաստանցի մարզիկներ Եվգենյա Մեդվեդևայի (հոր կողմից` Բաբասյան) և Ալինա Զագիտովայի ռեկորդները նույնպես զրոյացրել են` նրանց բարձր միավորները ամրագրելով պատմության էջերում։ Նման որոշում է ընդունվել ծրագրի կատարման մակարդակի գնահատականի համակարգի փոփոխության պատճառով։ Նոր համակարգը կգործի մրցաշրջանի սկզբից։
Նորամուծությունը պայմանավորված է այն հանգամանքով, որ նոր մրցաշրջանից փոխվելու է գնահատման համակարգը։ Այսուհետև շարժումները կգնահատվեն —5-ից մինչև +5 սանդղակով, այլ ոչ թե —3-ից մինչև +3, ինչպես եղել է նախկինում։
Դրա հետ կապված` հաջորդ մրցաշրջանից մարզիկների արդյունքները կհաշվարկեն մաքուր էջից։
Եվգենյա Մեդվեդևան երկար ժամանակ մարզվում էր Էթերի Տուտբերիձեի մոտ։ Մարզիկը երկու տարի շարունակ մրցումներում չի պարտվել, բոլորը կարծում էին, որ 2018 թվականի Օլիմպիադային նա համարժեք մրցակից չի ունենա։
Սակայն Օլիմպիադայից առաջ Եվգենյան վնասված էր ստացել ու մարզումները բաց թողել, Տուտբերիձեի մյուս սանը՝ Ալինա Զագիտովան, նրանից առաջ էր անցել։ Մրցաշրջանի ավարտից հետո Մեդվեդևան հեռացավ Տուտբերիձեից ու տեղափոխվեց Կանադա՝ մարզիչ Բրայան Օրսերի մոտ։
Նա հայտնել էր, որ Կանադայում իրեն ավելի հանգիստ է զգում ու դա լավ կանդրադառնա իր ինքնազգացողության ու մարզումների վրա։
Մեդվեդևան շարունակելու է ելույթ ունենալ Ռուսաստանի անունից։