ԵՐԵՎԱՆ, 16 օգոստոսի — Sputnik. Եթե ՀՀ երկրորդ նախագահ Ռոբերտ Քոչարյանի փաստաբաններն իրենց պաշտպանյալին առաջադրած պետական մեղադրանքը «իրավական անգրագիտություն» են անվանել, ապա դա միայն ցուցադրում է նրանց անդաստիարակության մակարդակը։ Այս մասին հինգշաբթի կառավարության նիստից հետո լրագրողներին ասաց Հատուկ քննչական ծառայության ղեկավար Սասուն Խաչատրյանը։
«Ես երբեք ինձ թույլ չեմ տա մյուս իրավաբանի դրսևորած գործունեությունը որակել տգիտություն կամ անգրագիտություն, ինչպես Քոչարյանի պաշտպանական կողմն է նման հայտարարություններ անում», — ասաց նա։
Ավելի վաղ Քոչարյանի փաստաբանները անընդունելի էին համարել Սասուն Խաչատրյանի գնահատականները։
Օգոստոսի 13-ին Ռոբերտ Քոչարյանին ազատ էին արձակել Վերաքննիչ դատարանի որոշմամբ։ Սակայն պետական մեղադրանքը դեռ հանված չէ և բողոքարկվելու է Վճռաբեկ դատարանում։
Հիշեցնենք, որ ՀՔԾ-ն հուլիսի 26-ին 2008 թվականի մարտի 1-ի ցույցը ցրելու քրեական գործի շրջանակներում մեղադրանք էր առաջադրել ՀՀ երկրորդ նախագահ Ռոբերտ Քոչարյանին սահմանադրական կարգը տապալելու համար։ Մեկ օր անց նրան երկու ամսով կալանավորել էին։ Քոչարյանի պաշտպանները բողոքարկել էին վերաքննիչ դատարանում, որը չեղյալ էր հայտարարել առաջին ատյանի դատարանի որոշումը` բացատրելով դա նախկին նախագահի անձեռնմխելիությամբ։ Քոչարյանը մեղադրանքները կեղծված քաղաքական հետապնդում է համարում։