ԵՐԵՎԱՆ, 16 օգոստոսի — Sputnik. Երևանի ավագանու ընտրություններին որևէ խախտում չպետք է լինի։ Կառավարության նիստի ժամանակ նման պահանջ ներկայացրեց ՀՀ վարչապետ Նիկոլ Փաշինյանը։
Նրա խոսքով` սա առաջին խոշոր ընտրություն է, որը տեղի է ունենալու նոր իշխանության օրոք, և այն պետք է աննախադեպ լինի օրինականության և արդարության տեսանկյունից։
«Ընտրակեղծիքներն ընտրություններում տեղ չունեն։ Իսկ եթե որևէ մեկին թվա, որ ունեն, ապա գործին կմիջամտեն իրավապահ մարմինները։ Բոլոր նրանք, ովքեր կփորձեն կաշառել կամ վախեցնել ընտրողներին, անպատիժ չեն մնա։ Եթե կփորձեն խախտել օրենքը, ընտրությունն իրենցն է։ Հետևանքները հայտնի են», — ասաց Փաշինյանը։
Հիշեցնենք, որ Երևանի քաղաքապետ Տարոն Մարգարյանը հուլիսի 9-ին հրաժարական տվեց։ Հուլիսի 16-ին Ավագանին հավաքվեց նոր քաղաքապետ ընտրելու համար, սակայն քվորումի բացակայության պատճառով նիստը չկայացավ։ Ավագանիում մեծամասնություն կազմող ՀՀԿ ներկայացուցիչներն այլ թեկնածու չառաջադրեցին։ Երկու շաբաթվա ընթացքում թեկնածու չառաջադրեցին նաև մյուս երկու խմբակցությունները` «Ելքն» ու «Երկիր ծիրանին»։
Այդ դեպքում, տեղական ինքնակառավարման մասին օրենքի համաձայն, կառավարությունը հաստատեց Ավագանու ցրումը։ Դրանից հետո ավագանու նոր ընտրությունները պետք է տեղի ունենան ոչ շուտ, քան 30 օր հետո և ոչ ուշ, քան 40 օր հետո։ ՀՀ ոստիկանությունն Ավագանու արտահերթ ընտրություններ կազմակերպելու համար 87,6 մլն դրամ կստանա (մոտ 180 հազար դոլար)։ ԿԸՀ-ն նիստ կգումարի և 30-40-օրյա ժամկետում կնշանակի ընտրությունների օրը: