ԵՐԵՎԱՆ, 15 օգոստոսի — Sputnik. Խաբարովսկում «Խոհանոց առանց սահմանների» փառատոնի ժամանակ ներկայացվել է հայկական խոհանոցը։ Այս մասին հայտնում է «Молодой дальневосточник» թերթը։
«Մենք` հայերս, իհարկե, գլուխգովան ենք։ Աղջիկս ինձ ասում է, որ նույնիսկ եգիպտական բուրգերն են հայերը կառուցել։ Դա, իհարկե, կատակ է, բայց…», – ասում է փառատոնի մասնակից Աննա Գրիգորյանը։
Հայկական ուտեստների շնորհանդեսն անցկացվում էր «Շաշլիչնի դվոր» սրճարանում։ Ինչպես ընդունված է, փողոցում մանղալ էր դրված, իսկ կողքին` տաղավարներ և լիճ կար։ Աննան ու մայրը` Ալլա Գրիգորյանը, ներկայացրել են հաճարով փլավ ավանդական ուտեստը, որը հավով կամ սնկով են պատրաստում։ Փլավի պատրաստման ընթացքը արարողակարգ հիշեցրեց, ուտեստն իջեցնում են թոնրի մեջ և պատրաստում ողջ գիշեր, իսկ առավոտյան, համտեսելուց առաջ, տանտերերը այն բաժանում էին աղքատ ընտանիքներին։
«Երբ բարի գործի համար էին աղոթում, պետք էր առնվազն 7 աղքատ ընտանիք կերակրել», – ընդգծեց Ալլան։
Հայուհիները բացահայտել են նաև իսկական տոլմայի և խորովածի պատրաստման գաղտնիքները, որպես առանձնահատկություն նշելով խորոված բանջարեղենը։ Բացի այդ շամփուրի վրա շարված սալով կարտոֆիլը։ Կովկասում ամեն տեղ չէ, որ նման ուտեստ են պատրաստում։
Հայկական ճաշկերույթի անբաժան բաղկացուցիչը, նրանց համոզմամբ, թարմ կանաչին է` համեմ, ռեհան, մաղադանոս, ինչպես նաև թթուն։
Շնորհանդեսի ժամանակ չմոռացան նաև հոգևոր սննդի մասին։ Հայկական երաժշտություն էր հնչում, հայկական երգ ու պար ներկայացրեց Խաբարովսկի «Շիրակ» համույթը։