ԵՐԵՎԱՆ, 15 օգոստոսի — Sputnik. Հայկական կողմը մշտապես իր պատրաստակամությունն է հայտնել քննարկելու Հայաստանի տարածքով իրանական էլեկտրաէներգիան երրորդ երկիր արտահանելու հարցը (այդ թվում՝ Եվրասիական տնտեսական միություն և Եվրոպական միություն)՝ Հայաստանը դարձնելով տարանցիկ միջանցք: Sputnik Արմենիային այս մասին ասաց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը։
«Ինչպես գիտեք, տարանցիկ միջանցքի ստեղծմանն են ուղղված Հայաստանի, Ռուսաստանի, Իրանի և Վրաստանի միջև 2015-2016 թթ. ստորագրված «Հյուսիս-հարավ էլետրաէներգետիկական միջանցք» քառակողմ համագործակցության մասին հուշագրերը»,- նշեց նա:
Նախարարի խոսքով` քայլեր են ձեռնարկվում հուշագրերով ամրագրված պայմանավորվածությունները կյանքի կոչելու համար:
«Նաև այդ նպատակով է, որ զարգացնում ենք Հայաստանի էներգետիկ ենթակառուցվածքները, մասնավորապես՝ Հայաստան-Իրան և Հայաստան-Վրաստան էլեկտրահաղորդման գծերի կառուցումը նոր հնարավորություն կստեղծի էլեկտրաէներգիայի արտահանման, ներմուծման, տարանցման, սեզոնային փոխհոսքերի թողունակությունն ավելացնելու հարցերում»,- ասաց Գրիգորյանը:
Ըստ նրա`նշված ծրագրերի իրականցումը որակապես նոր մակարդակի կբարձրացնի Հայաստանի էներգահամակարգը տարածաշրջանային համագործակցության շրջանակներում:
Հիշեցնենք` Իրանի էներգետիկայի նախարար Ռեզա Արդականիանը օգոստոսի 13-ին հայտարարել էր, որ Իրանը բանակցություններ է սկսել Հայաստանի տարածքով Ռուսաստանին էլեկտրաէներգիա մատակարարելու հնարավորության շուրջ: