ԵՐԵՎԱՆ, 14 օգոստոսի — Sputnik. ԱՊՀ երկրների միասնական հակաօդային պաշտպանության (ՀՕՊ) զարգացման հարցը կքննարկեն Համադաշնության պաշտպանության նախարարների խորհրդին կից Համակարգող կոմիտեի նիստի ժամանակ։ Այս մասին հայտնում է Ռուսաստանի պաշտպանության նախարարությունը։
«ԱՊՀ մասնակից երկրների միասնական հակաօդային պաշտպանության (ՀՕՊ) կատարելագործման ու զարգացման հիմնական ուղղությունները կքննարկվեն Մինսկում օգոստոսի 14-ին կայանալիք ԱՊՀ երկրների պաշտպանության նախարարությունների խորհրդի հակաօդային պաշպանության հարցերի համակարգող կոմիտեի 49-րդ նիստի ընթացքում», — հայտնում է Ռուսաստանի պաշտպանության նախարարությունը։
Կոմիտեի նիստին կմասնակցեն Ռուսաստանի, Հայաստանի, Բելառուսի, Ղազախստանի, Ղրղըզստանի, Տաջիկստանի ու Ուզբեկստանի պաշտպանության նախարարությունների պատվիրակությունները, Հավաքական անվտանգության պայմանագրի կազմակերպության ներկայացուցիչները, Ռուսաստանի ռազմաարդյունաբերական համալիրի ձեռնարկությունները, ԱՊՀ երկրների ՀՕՊ խնդիրների հետազոտման բազային կազմակերպության ղեկավարները։
Նիստի մասնակիցները կքննարկեն Համակարգող խորհրդի գործունեության այս տարվա արդյունքները, 2019 թվականին ԱՊՀ ՀՕՊ միացյալ համակարգի համատեղ օպերատիվ ու մարտական պատրաստության կազմակերպման առանձնահատկություններն ու յուրահատկություններ, հակաօդային պաշտպանության ոլորտի առաջնային հետազոտությունները, նաև ՀՕՊ համակարգի կատարելագործման ու զարգացման մի շարք հարցեր։