ԵՐԵՎԱՆ, 8 օգոստոսի — Sputnik. Կարևոր է հոգեկան աջակցություն ցուցաբերել Մոսկվայում հոր` Միխայիլ Խաչատուրյանի սպանության մեջ մեղադրվող քույրերին։ Այսպիսի հայտարարություն է արել Երեխայի իրավունքների հարցերով ՌԴ նախագահի լիազոր ներկայացուցիչ Աննա Կուզնեցովան։
Նշենք, որ ավելի վաղ Կուզնեցովայի մամուլի ծառայությունը հայտնել էր, որ ՄԻՊ–ը դիմել է Մոսկվայի դատախազություն` խնդրելով իրավական գնահատական տալ աղջիկների դպրոցի ու խնամքի մարմինների գործողություններին։ Ընդգծվում էր, որ ուսումնական հաստատության ղեկավարությունը պարտավոր էր ուշադրություն դարձնել, որ աղջիկները դպրոց գրեթե չեն հաճախում։ Իրավապաշտպանների տվյալներով` աղջիկներն ասել էին, որ 2017 թվականին ութ անգամ են դպրոց գնացել։
«Շատ կարևոր է, որ հիմա աղջիկներին հոգեբանական աջակցություն ցուցաբերվի, քանի որ նրանց վիճակը… մենք կարող ենք միայն երևակայել` ինչ է հիմա կատարվում», – ասել է Կուզնեցովան «Ռոսիա 24» հեռուստաալիքի հետ հարցազրույցում։
Աղմկահարույց սպանությունը տեղի է ունեցել Մոսկվայի հյուսիս–արևելքում հուլիսի 27-ին։ Քննության վարկածով, քույրերը հարձակվել են հարազատ հոր վրա, երբ նա քնած է եղել ճոճվող բազկաթոռին։ Հարցաքննության ժամանակ աղջիկները խոստովանել են մեղքը և պարզաբանել, որ «նրանք հոր հետ վատ հարաբերություններ են ունեցել երկար տարիների ընթացքում իրենց բարոյական տանջանքներ պատճառելու համար»։
Ավելի ուշ, միջնեկ քույրը` Անգելինան, որը 18 տարեկան է, հայտնել է, որ հայրը ծաղրել և սեռական բնույթի ոտնձգություններ է իրականացրել նրանց նկատմամբ: