ԵՐԵՎԱՆ, 8 օգոստոսի — Sputnik. Օգոստոսի 12-ի, 13-ի և 14-ի գիշերները երկրի բնակիչները հնարավորություն կունենան աստղային անձրև տեսնելու։ Այս շաբաթվա վերջին երեք գիշերը Պերսեիդների ասուպային հոսք կդիտվի: Այս մասին Sputnik Արմենիայի հետ զրույցում ասել է Գիտությունների ազգային ակադեմիայի Վիկտոր Համբարձումյանի անվան Բյուրականի աստղադիտարանի տնօրեն Արեգ Մելիքյանը։
«Երկիրն Արեգակի շուրջն իր տարեկան պտույտի ժամանակ անցնում է մի շարք երկնաքարերի խմբերի միջով, որոնք առաջացել են տարբեր տիեզերական երևույթների արդյունքում և որպես կանոն շատ մանր են լինում։ Այդ իսկ պատճառով, երբ երկիրն անցնում է դրանց միջով, դրանք հայտնվում են երկրի մթնոլորտում ավելի քան 100 կմ վայրկյան արագությամբ։ Եվ այդ արագության շնորհիվ երկրի մթնոլորտում հայտնվելիս շփման հետևանքով այրվում են` առաջացնելով լուսավոր հետքեր»,- բացատրելով տիեզերական երևույթի առաջացման պատճառը` ասաց Մելիքյանը։
Եթե սովորաբար գիշերը մարդը կարող է ժամեր շարունակ նայել երկնքին ու ոչ մի ընկնող աստղ չտեսնել, ապա նման հոսքերի ժամանակ 1 ժամում հնարավոր է մի քանի տասնյակ ասուպ տեսնել։
Երկնաքարերը, որոնց մարդիկ ավելի հաճախ ասուպ կամ աստղ են անվանում, իրականում, Արեգ Մելիքյանի խոսքով, շատ մանր են` մի քանի միլիմետրից մինչև տասնյակ սանտիմետրեր տրամագծով։ Ընդ որում, որքան մեծ է երկնաքարը, այնքան ավելի մեծ է հավանականությունը, որ այն ամբողջությամբ չի այրվի և կհասնի երկրի մակերևույթին։ Նման երևույթի հետևանք էր նաև 2013թ.-ին ՌԴ Չելյաբինսկի շրջանում ընկած երկնաքարը, որի միայն հարվածային ալիքը մեծ վնաս հասցրեց շրջակա բնակավայրերին։
«Այդ վտանգն, իհարկե, կա, բայց խոշորները, բարեբախտաբար, ավելի քիչ են։ Սովորաբար, ավելի շատ են մանր քարերը»,- ասաց մեր զրուցակիցը։
Հնարավոր վտանգի վրա չկենտրոնանալու և տիեզերական գեղեցիկ տեսարանով հիանալու համար, աստղադիտարանի տնօրենն առաջարկում է մեկնել Երևանից դուրս, քանի որ մեծ քաղաքի լուսավորությունը խանգարում է տեսնել երկնքում երևացող լույսերը։
Բայց «աստղային անձրևին» հետևելու ամենահարմար տարբերակն, իհարկե, Բյուրականի աստղադիտարան այցելելն է, որտեղ փոքր դիտակներով ու մասնագետների ուղեկցությամբ հնարավոր է ավելի շատ ասուպներ տեսնել, քան անզեն աչքով։