ԵՐԵՎԱՆ, 7 օգոստոսի — Sputnik. Իսկական դետեկտիվային պատմություն է ծավալվել Դաղստանում. տեղի հեղինակության որդուց, որը սպանության համար մեղադրվելով երկար տարիներ թաքնվում էր Ադրբեջանում և Ֆրանսիայում, անմիջապես վրեժխնդիր են եղել, երբ նա հայրենիք է վերադարձել։
Այս մասին հայտնել է Mash տելեգրամ-ալիքը։
Ամեն ինչ սկսվել էր 2005 թվականին Դերբենդում տեղի ունեցած վիճաբանությունից։ Այն ժամանակ սպանվել էր տեղի բնակիչ` Յարմետ Յարալիևը։ Սպանության գլխավոր կասկածյալը տեղի «հեղինակության» որդին էր` Շամիլ Ֆեյզուլաևը։
Սակայն Շամիլ Ֆեյզուլաևը սպանությունից անմիջապես հետո փախուստի էր դիմել։ Երկար տարիներ նա թաքնվում էր Ադրբեջանում, այնուհետև մեկնել էր Ֆրանսիա։ Այստեղ նա հինգ տարի է անցկացնում, մինչև նրան կալանավորում և արտաքսում են Դաղստան։
Սակայն այդ ժամանակ էլ արդարադատությունը չհաղթանակեց։ Ի զարմանս սպանված Յարմետ Յարալիևի բարեկամների՝ դատարանն անմիջապես ազատ արձակեց Ֆեյզուլաևին՝ որպես խափանման միջոց ընտրելով երկիրը չլքելու վերաբերյալ ստորագրությունը։
Այնուամենայնիվ, տղան երկար չկարողացավ վայելել անհոգ ու ազատ կյանքը։ Օգոստոսի 4-ին Շամիլ Ֆեյզուլաևը ավտոմեքենայով էր, երբ նրան կանգնեցրին երկու անծանոթ և կրակ բացեցին տրավմատիկ ատրճանակից։
Հայտնում են, որ ոստիկանությունում հարձակման պատճառների մասին տուժածը լռել է, սակայն տեղի բնակիչները համոզված են, որ դա վրեժխնդրություն է եղել։