ԵՐԵՎԱՆ, 6 օգոստոսի — Sputnik. Սյունիքի նախկին մարզպետ Սուրիկ Խաչատրյանի որդին`Տրդատ Խաչատրյանը բանակում ծառայելու իր ցանկության մասին հայտնի նամակը գրել է այն բանից հետո, երբ հայտնվել է հոգեբուժարանում։
Այս մասին Sputnik Արմենիային հայտնեց ՀՀ քննչական կոմիտեի նախագահի խորհրդական Սոնա Տռուզյանը։
Նա հայտնեց, որ քրեական գործով Տրդատ Խաչատրյանի նկատմամբ ստացիոնար դատահոգեբուժական հանձնաժողովային փորձաքննություն նշանակելու որոշում է կայացվել։ «Նախաքննական մարմինը միջնորդություն ներկայացրել ընդհանուր իրավասության դատարան՝ փորձաքննությունը կատարելու նպատակով նրան բժշկական հաստատությունում տեղավորելու մասին, ինչը բավարարվել է»,– ասաց Տռուզյանը։
Ստացիոնար փորձաքննությունը մեկնարկել է հուլիսի 30-ից, հետևաբար, երեկ հրապարակված նամակը գրվել է դրա ընթացքում։
ՔԿ զինվորական քննչական գլխավոր վարչության վարույթում քննվող քրեական գործով Տրդատ Խաչատրյանին մեղադրանք է առաջադրվել ՀՀ քրեական օրենսգրքի 327-րդ հոդվածի 2-րդ մասի 2-րդ կետով, այն է` փաստաթուղթ կեղծելու կամ խաբեության այլ ճանապարհով ժամկետային զինվորական ծառայությունից խուսափելը։
Երեկ Տրդատ Խաչատրյանի փաստաբանը հրապարակել էր իր պաշտպանյալի` պաշտպանության նախարար Դավիթ Տոնոյանին ուղղված նամակի տեքստը։
Դրանում նախկին մարզպետի որդին նշում է, որ իր հոգեկան վիճակի վրա ազդել է 2013թ.-ին իրենց տան բակում տեղի ունեցած Ավետիք Բուդաղյանի սպանության դեպքը։
«Նշված դեպքին ես մասնակից եմ եղել եւ վիրավորներին օգնել։ Իմ ձեռքի մեջ է մահացել Ավետիք Բուդաղյանը, և ես տղաների օգնությամբ իմ ձեռքերով դրել եմ վիրավորներին ավտոմեքենայի մեջ, և տեղափոխել Գորիսի հիվանդանոց: Այս երևույթը ինձ վրա ծանր ազդեցություն է գործել: Եվ ահա նշված դեպքից մեկ տարի հետո բժիշկներն ախտորոշել են «նևրասթենիա չափավոր արտահայտված» և այդ պատճառով ստացել եմ տարկետում, թեև այն ժամանակ էլ ցանկացել եմ զորակոչվել»,– գրում է Տրդատ Խաչատրյանը:
Դիմելով պաշտպանության նախարարին` Խաչատրյանը խնդրում է` անկախ փորձաքննության եզրակացությունից իրեն հնարավորություն տալ ծառայել բանակում։
Հիշեցենք, ավելի վաղ ոստիկանությունը հայտնել էր, որ նախկին մարզպետի որդիները` Տիգրան և Տրդատ Խաչատրյանները, չտառապելով ժամկետային զինվորական ծառայությունից ազատվելու համար հիմք հանդիսացող հիվանդությամբ, ձեռք են բերել կեղծ փաստաթղթեր, որոնցով ազատվել են ժամկետային զինվորական ծառայությունից:
Ընդ որում, պարզվել է, որ եղբայրները 16 տարեկանում զինծառայության համար պիտանի են ճանաչվել։
2013թ–ի ամռանը Գորիսում կրակել էին Բուդաղյան եղբայրների վրա: Գորիսի քաղաքապետի նախկին թեկնածու Ավետիք Բուդաղյանը մահացել էր։ Մյուս եղբայրը՝ Արցախի ՊԲ զորամասերից մեկի հրամանատար, գնդապետ Արտակ Բուդաղյանը վիրավորվել։
Սպանության փաստով հարուցված քրեական գործը առ այսօր չի բացահայտվել։