ԵՐԵՎԱՆ, 6 օգոստոսի — Sputnik. Ռոբերտ Քոչարյանի խափանման միջոցը փոխելու միջնորդությունը դատարանը կքննի օգոստոսի 9-ին:
Այս մասին Sputnik Արմենիայի հետ զրույցում տեղեկացրել է Հայաստանի Հանրապետության երկրորդ նախագահ Ռոբերտ Քոչարյանի պաշտպաններից Արամ Օրբելյանը:
Ըստ փաստաբանի՝ դատական նիստը նշանակված է ժամը 12:00
Հիշեցնենք, որ Ազգային ժողովի մի շարք պատգամավորներ միացել էին Քոչարյանի խափանման միջոցը փոխելու ստորագրահավաքին: Դիմումը ստորագրել են, ընդհանուր առմամբ, օրենսդիրներից 46-ը: Քոչարյանի գրասենյակի ղեկավար Վիկտոր Սողոմոնյանը «Հետք»-ին հայտնել է, որ ստորագրահավաքին միացել է ՀՀԿ խմբակցության 42, ՀՅԴ խմբակցության 3 և «Ծառուկյան» խմբակցության 1 պատգամավոր:
«Ծառուկյան» խմբակցությունից ստորագրահավաքին միացել է Իշխան Զաքարյանը:
Հայտնի է, որ ՀՀԿ-ից ստորագրահավաքին միացած պատգամավորների թվում են Ազգային ժողովի նախագահ Արա Բաբլոյանը, Ազգային ժողովի փոխնախագահներ Արփինե Հովհաննիսյանը և Էդուարդ Շարմազանովը:
Ստորագրահավաքին միացած ՀՀԿ խմբակցության մյուս պատգամավորների և ՀՅԴ խմբակցության 3 պատգամավորի անունները դեռ չեն հրապարակվել: