ԵՐԵՎԱՆ, 5 օգոստոսի — Sputnik. Կրկին քաղաքացիներ են մոլորվել: Այսօր ժամը 18:05-ին «911»-ն ահազանգ է ստացել, որ Տավուշի մարզի Դիլիջանի տարածաշրջանում գտնվող «Պարզ լճին» հարակից անտառում 2 քաղաքացի է մոլորվել. անհրաժեշտ է փրկարարների օգնությունը:
Նշենք, որ սա այսօր Տավուշի մարզում հանգստի մեկնածների կորելու երկրորդ դեպքն է: Ժամը 17:04-ին «911» ծառայությանը կրկին ահազանգ էր ստացել, որ Տավուշի մարզի Ենոքավան համայնքի «Լաստիվեր» հանգստյան գոտում 15 հոգուց բաղկացած արշավախմբի անդամներից մեկը կորել է:
Երկու դեպքերի վայրեր էլ մեկնել են ԱԻՆ ՓԾ հրշեջ-փրկարարական ջոկատից մեկական մարտական հաշվարկներ:
Լրացում.
Ավելի ուշ ԱԻՆ-ից տեղեկացրեցին, որ ժամը 18:00-ի սահմաններում փրկարարները գտել են «Լաստիվերի» տարածքում կորած քաղաքացուն, իսկ Պարզ լճի անտառում մոլորվածներին հայտնաբերել են ժամը 20:17-ին: