ԵՐԵՎԱՆ, 3 օգոստոսի — Sputnik, Արմենուհի Մխոյան. ՀՀ-ում Իտալիայի պատվո հյուպատոսն ինքնակամ, առանց համաձայնության գալու քաղաքային իշխանությունների հետ, քանդել է Գյումրու Ռուսթավելի փողոցի մայթի մի հատվածը՝ քաղաքին պատճառելով մոտ 1 մլն 534 հազար դրամի վնաս:
Օգոստոսի 3-ին Գյումրու քաղաքապետի տեղակալ Ռուբեն Սանոյանի գլխավորությամբ կայացած քաղաքաշինական հանձնաժողովի արտահերթ նիստի ժամանակ, որին հրավիրված էր նաև ՀՀ-ում Իտալիայի պատվո հյուպատոս Անտոնիո Մոնտալտոն, ներկայացվեց վնասի այն չափը, որը հասցվել էր քաղաքին հյուպատոսի հանձնարարականով նոր հիմնանորոգված փողոցի մի հատվածը քանդելու պատճառով: Հյուպատոսը որոշել է ինքնակամ փոփոխություն անել, ու նրա հանձնարարականով քանդվել է Ռուսթավելի և նրան կից փողոցի մայթի մի հատվածը: Ի դեպ, սա այն նույն փողոցն է, որը հիմնանորոգվել էր նախկին վարչապետ Կարեն Կարապետյանի նախաձեռնությամբ:
Բացատրելով իր արարքը` հյուպատոսը նշեց, որ փողոցը հիմնանորոգվել է թերություններով և քաղաքաշինական նորմերի խախտմամբ։ Ռուսթավելի 30 հասցեում է գտնվում հյուպատոսի կողմից բացված կերամիկայի արհեստանոցը: Փողոցի հիմնանորոգման համար իրականացված աշխատանքների պատճառով, ըստ հյուպատոսի, խաթարվել է տվյալ կառույցի արտաքին տեսքը: «Ես փողոցի հիմնանորոգման ժամանակ այդ հարցով դիմեցի քաղաքի ճարտարապետին և «Կումայրի» արգելոցի տնօրենին, ասացին, որ կա ժամկետի մեջ տեղավորվելու խնդիր և նախագծային փոփոխություն հնարավոր չէ անել»,–ասաց նա:
Հյուպատոսին վրդովեցնում է այն հանգամանքը, որ քաղաքում շատ կառույցներ ինքնակամ են կառուցվում, բացի այդ «Կումայրի» արգելոցի մեջ գտնվող կառույցներն են փոփոխվում, փողոցի հիմնանորոգումը ևս նախագծվել և իրականացվել է առանց հաշվի առնելու դրա նախկին տեսքը: «Դիմեք դատարան»,- վրդովված նշեց Անտոնիո Մոնտալտոն:
Փոխքաղաքապետը փաստեց՝ հաշվի առնելով պատվո հյուպատոսի այսքան տարիների կատարած աշխատանքները` Գյումրիում քաղաքապետարանը չի դիմել իրավապահ մարմիններին, սակայն մինչ այս փոխհամաձայնության գալու բազմաթիվ կոչերին հյուպատոսը այդպես էլ չի արձագանքել:
«Քաղաքին պատճառվել է 1 մլն 534 հազար դրամի վնաս: Եթե հյուպատոսը կհամաձայնի սեփական միջոցներով վերականգնել պատճառած վնասը՝ փողոցը բերելով նախկին տեսքի, հարցն իրավական ոլորտ չի տեղափոխվի, սակայն եթե հյուպատոսը կթողնի ամեն ինչ այդպես, ապա հարցն այլ հարթության վրա կքննվի»,-նշեց Ռուբեն Սանոյանը՝ հավելելով, որ նախկին տեսքին մայթը բերելուց հետո արդեն հյուպատոսը կարող է դիմել քաղաքաշինական հանձնաժողովին՝ այդ փոփոխությունը ըստ նոր նախագծի իրականացնելու խնդրով:
Պատվո հյուպատոսն ի վերջո համաձայնեց սեփական միջոցներով վերականգնել այդ հատվածը, սակայն նշեց, որ անպայման դիմելու է հանձնաժողովին` ըստ նոր նախագծի փոփոխություն անելու համար: