ԵՐԵՎԱՆ, 2 օգոստոսի — Sputnik. Հայաստանի փոխարտգործնախարար Ռուբեն Ռուբինյանը կոչ է արել ՀՀ ԱԺ փոխխոսնակ Էդուարդ Շարմազանովին մտածել պետական շահերի մասին։ Այս մասին նա ասաց Sputnik Արմենիայի թղթակցի հետ զրույցում` մեկնաբանելով փոխխոսնակի երեկվա հայտարարությունը։
Նախօրեին ԱԺ փոխխոսնակ Էդուարդ Շարմազանովը հանդես էր եկել հայտարարությամբ, որում նշել էր, որ հայ-ռուսական հարաբերությունները լավագույն ժամանակներ չեն ապրում։ «Հայաստանի ու Ռուսաստանի ժամացույցի սլաքները տարբեր ուղղությամբ են շարժվում»,– ասել էր նա։
«Շարմազանովն ու նրա կուսակիցները պետք է մտածեն Հայաստանի պետական շահի մասին և չփորձեն դիվիդենդներ ստանալ հայ-ռուսական հարաբերությունների հաշվին», – նշեց Ռուբինյանը։
Նա նաև նշեց, որ ԱԳՆ պաշտոնական հայտարարության մեջ ամեն ինչ գրված է Լավրովի մտավախությունների մասին և նա ավելացնելու ոչինչ չունի։
Նախօրեին ԱԳՆ մամուլի քարտուղար Տիգրան Բալայանը հայտարարություն էր տարածել, որում նշել էր, որ ՀՀ կառավարությունը միտված է հայ-ռուսական դաշնակցային հարաբերությունների հետագա զարգացմանն ու ամրապնդմանը, ԵԱՏՄ և ՀԱՊԿ շրջանակներում արդյունավետ փոխգործակցության բարձրացմանը։
Ռուսաստանի արտգործնախարար Սերգեյ Լավրովը հուլիսի 31-ին լրագրողների հետ զրույցում հայտարարել էր, որ Հայաստանում տեղի ունեցող իրադարձությունները հակասում են իրենց նախորդների նկատմամբ քաղաքական հետապնդումից հրաժարվելու մասին` երկրի նոր ղեկավարության հայտարարություններին։ Նրա խոսքով` Մոսկվան որպես Երևանի դաշնակից միշտ հետաքրքրված է եղել հայկական պետության կայունությամբ։