ԵՐԵՎԱՆ, 1 օգոստոսի — Sputnik. Հայաստանի ԶՈՒ ղեկավարությունը որոշել է տնտեսել պայմանագրային զինծառայողների սննդի վրա։Ինչպես Sputnik Արմենիային հայտնել է զորամասերից մեկի աղբյուրը, արդեն մի քանի օր է պայմանագրային զինծառայողները չեն կարողանում սնվել զորամասի հաշվին, իսկ դա նշանակում է, որ նրանց ուրիշ ոչինչ չի մնում, քան իրենց հետ սնունդ բերելը։
Իրավիճակը հետաքրքրական է նրանով, որ մինչ վարչապետ Նիկոլ Փաշինյանն արգելում է զինվորներին պարենամթերք, հագուստ, կոշիկներ և այլ պարագաներ ուղարկել տնից, զինվորական հրամանատարությունը կրճատում է պայմանագրային զինծառայողներին հասանելիք պարենամթերքը։
Sputnik Արմենիայի զրուցակիցը հայտնել է, որ զորամասի հրամանատարությունը «վերևից» հրաման է ստացել մարտական ծառայություն չիրականացնող, տեխնիկական աշխատանք կատարող պայմանագրայիններին պարենամթերքով չապահովել։
Նրանց հրահանգել են սնվել սեփական միջոցների հաշվին։ Ամեն ինչ լավ կլիներ, եթե այդ մարդիկ ամսական 110 հազար դրամ չստանային։ Ծառայության ընթացքում սնվելու համար նրանք ամսական ստիպված են լինելու ոչ պակաս, քան 20 հազար դրամ ծախսել. այդ դեպքում հարց է ծագում՝ ինչ կմնա տակը ընտանիքը կերակրելու համար։
Բացի այդ մեկ այլ խնդիր ևս կա՝ զորամասի տարածքում տնից բերած սնունդը պահելու համար համապատասխան պայմանների բացակայությունը։ Խնդիրն առավել արդիական է տարվա այս սեզոնին` ամառվա տապին։
Sputnik Արմենիայի հարցմանն ի պատասխան պաշտպանության նախարարությունից հայտնեցին, որ պայմանագրային զինծառայողները ամեն ամիս 10 հազար դրամի չափով հավելավճար են ստանում սնվելու համար։
Սակայն զինծառայողները նշում են, որ այդ գումարը բավարար չէ նորմալ սնվելու համար, բացի այդ՝ հավելավճարների մասին պնդումները վիճահարույց են համարում, քանի որ նրանք որևէ լրացուցիչ գումար չեն ստացել։
Պաշտպանության նախարարի մամուլի քարտուղար Արծրուն Հովհաննիսյանը մեր պարբերականին ասաց, որ վերակարգի մեջ գտնվող զինծառայողներին զորամասի հաշվին կերակրելը ներքին որոշում էր, սակայն այժմ այդ պրակտիկան այլևս չի գործելու։ Իսկ թե ինչպես են վերացնելու այն լրացուցիչ դժվարությունները, որոնց տվյալ պարագայում բախվում են զինվորները, գերատեսչությունում դեռ չեն պարզաբանում։