ԵՐԵՎԱՆ, 1 օգոստոսի – Sputnik. Հայտնի գեղասահորդուհի Իրինա Սլուցկայան շատ է սիրում հայկական մուրաբան ու տեղական ձուկը։ Այս մասին նա ասել է Sputnik Արմենիայի թղթակցի հետ զրույցում։
«Դա մի դժբախտություն է», – ժպիտով անկեղծանում է Սլուցկայան` պատասխանելով այն հարցին, թե ինչպես է նա հաջողացնում չգայթակղվել ոչ միայն ախորժալի, այլ հաճախ շատ կալորիականություն ունեցող հայկական ուտեստներով։
Նշենք, որ Սլուցկայան այս օրերին Երևանում է մայրաքաղաքում այս տարվա նոյեմներին կայանալիք «Ախթամար» սառցային շոուի պրեմիերայի նախապատրաստական գործերով։
«Մոսկվա եմ գնում, բեռնաթափվում եմ», – շարունակեց գեղասահորդուհին` նշելով, որ իսկապես դժվար է դիմակայել, քանի որ հայկական խոհանոցը «շատ համեղ» է։
Սլուցկայան ձուկ շատ է սիրում` ցանկացած ձևով պատրաստած, այդ պատճառով Հայաստանում առաջինը նա հենց ձկնային ուտեստներ է համտեսում։
Գեղասահորդուհին պարզապես սիրահարված է ավանդական հայկական մուրաբաներին (հատկապես` ընկույզի ու գիլասի), խորովածին ու լավաշին։
Երևանում Սլուցկայան ամեն անգամ իր համար նոր բան է բացահայտում։
«Երևանն այն քաղաքն է, որը չի կարելի մեկ շաբաթվա ընթացքում զգալ։ Ես արդեն մի քանի անգամ այստեղ եղել եմ ու ամեն անգամ նոր տեղեր ենք գնում։ Նորից ու նորից սիրահարվում եմ այս քաղաքին։ Որպես այդպիսին, սիրելի վայր չունեմ, շատ եմ հավանում քաղաքի կենտրոնը, որտեղ լիճ կա (Կարապի լիճը – խմբ.), – ասաց Սլուցկայան։
Նրա խոսքով` հայկական լեռները «պարզապես տիեզերք» են, որոնց հատուկ էներգետիկա են հաղորդում գետերն ու վանքերը։
«Ուզում եմ նորից ու նորից վերադառնալ։ Ես գիտեմ, որ երբ նորից գամ ինձ նոր տեղեր ցույց կտան, որից շունչս կկտրվի, ու այն ինձ կրկին կձգի», – ասաց Սլուցկայան։
Վերջին անգամ Սլուցկայան Երևան էր եկել 2017 թվականի դեկտեմբերին։ Այն ժամանակ նա երիտասարդ հայ գեղասահորդների համար վարպետության դասընթաց էր տվել Իրինա Ռոդնինայի անվան մարզադպրոցում։