ԵՐԵՎԱՆ, 31 հուլիսի – Sputnik. Թուրքիան, ի տարբերություն Հայաստանի, պատրաստ չէ բացել սահմանն առանց նախապայմանների։ Այս մասին այսօր լրագրողներին ասաց ՀՀ ԱԳՆ մամուլի քարտուղար Տիգրան Բալայանը։
«Թուրքիայի հետ առանց նախապայմանների հարաբերություններ հաստատելու պատրաստակամությունն ամրագրված է Հայաստանի նոր կառավարության ծրագրում», – ասաց Բալայանը։
Նա նշեց, որ գերատեսչությունում ուշադիր հետևում են ԶԼՄ–ների հրապարակումներին, սակայն Թուրքիան այն երկիրը չէ, որտեղ քաղաքականություն են իրականացնում` հաշվի առնելով մամուլի արձագանքը։
«Եթե թուրքական իշխանությունները համապատասխան ազդակներ ուղղեն, մենք կդիտարկենք դրանք։ Տվյալ պահին դրանք չկան», – ասաց Բալայանը։
Նրա խոսքով` Թուրքիայի նախագահի ու արտգործնախարարի վերջին այցերն ու հայտարարություններն այլ բանի մասին են վկայում։ Ոչ մի ազդակ չկա, որ Անկարան պատրաստ է սահմանը բացել առանց նախապայմանների։
Ավելի վաղ ՀՀ վարչապետ Նիկոլ Փաշինյանը հայտնել էր, որ Հայաստանը պատրաստ է առանց նախապայմանների երկխոսություն սկսել Թուրքիայի հետ։