ԵՐԵՎԱՆ, 30 հուլիսի — Sputnik. Քննչական կոմիտեն հայտնում է, որ ՔԿ նախագահ Հայկ Գրիգորյանի առաջարկով ստուգումներ կիրականացվեն Հայաստանի տուն-ինտերնատներում։ Գրիգորյանը դիմել է ՀՀ աշխատանքի և սոցիալական հարցերի նախարարին՝ առաջարկելով ստուգումներ և ապրանքանյութական արժեքների գույքագրում իրականացնել բոլոր նմանատիպ հիմնարկներում:
Այս առաջարկի համար հիմք են ծառայել կատարված բացահայտումները։
Այսպես` ՔԿ–ն բացահայտել է, որ «Վարդենիսի նյարդահոգեբանական տուն-ինտերնատ» ՊՈԱԿ-ի տնօրեն Ա.Հարությունյանը, համաձայնության գալով հիմնարկի պահեստապետի հետ, վաճառել է տուն–ինտերնատին մատակարարված 1260 կիլոգրամ տավարի միսը և գրպանել գումարը։ Իսկ 2018 թվականի հունիսի 1-ից մինչև հուլիսի 17-ն ընկած ժամանակահատվածում վաճառել է 3.569 լիտր կաթը, և դարձյալ գրպանել գումարը։ Պետությանը պատճառված վնասը հաշվարկվել է 3.069.940 ՀՀ դրամ, որը Հարությունյանը վերականգնել է նախաքննության ընթացքում։
Քննությունը, շարունակվում է` ՊՈԱԿ-ում հնարավոր այլ չարաշահումները բացահայտելու ուղղությամբ։
Մեկ այլ դեպք էլ օրերս բացահայտել էր առողջապահության նախարարությունը` հայտարարելով, որ կահույքի և պահածոների արտադրամասերը տարիներ շարունակ օգտագործել են Նուբարաշենի հոգեբուժարանի ջուրը։
Հրապարակման համաձայն, 2014 թ.-ին Նուբարաշենի հոգեբուժարանը ջրի դիմաց վճարել է 9 844 000 դրամ, 2015–ին` 9 370 000, 2016–ին` 9 030 000, 2017–ին` 16 846 000 և այս տարի միայն հունվար֊–հունիս ամիսներին` 10 212 000 դրամ։