ԵՐԵՎԱՆ, 26 հուլիսի — Sputnik. ՀՀ ֆինանսների նախարար Ատոմ Ջանջուղազյանը չի հստակեցրել հաջորդ տարվա բյուջեում աշխատավարձի և կենսաթոշակների բարձրացում կլինի, թե ոչ: Այս մասին այսօր կառավարության նիստից առաջ լրագրողներին ասաց ՀՀ ֆինանսների նախարար Ատոմ Ջանջուղազյանը։
Կառավարության նիստից առաջ լրագրողների հնչեցրած հարցին՝ արդյոք 2019-ի բյուջեի հիմքում կլինի աշխատավարձի և թոշակի բարձրացում՝ նախարար Ատոմ Ջանջուղազյանը պատասխանեց.
«Էական տարբերություններ բավականին վերջերս հաստատված միջնաժամկետ ծախսերի ծրագրից քննարկվող տարբերակում առայժմ չկան»:
Նա խորհուրդ տվեց ծանոթանալ միջնաժամկետ ծախսերի ծրագրին, 2019-ին կանխատեսվող հիմնական ցուցանիշներին: «Ես առաջարկում եմ ուսումնասիրել փաստաթղթերը»,-ասաց Ատոմ Ջանջուղազյանը՝ ի պատասխան «սոցիալական ծախսերն ավելանալու են, թե ոչ» ճշտող հարցին:
2019 թվականի պետբյուջեի նախագծի քննարկումներն արդեն մեկնարկել են։
Ծրագրի համաձայն` բյուջեի լրացուցիչ ծախսերն ուղղվելու են առաջին հերթին ոչ թե ընթացիկ ծախսերին (աշխատավարձեր ու թոշակներ), այլ ենթակառուցվածքային նախագծերին` ապագա տնտեսական աճի հիմքը դնելու համար։
Հիշեցնենք` վերջին անգամ Հայաստանում թոշակները բարձրացրել են 2015 թվականին։
Մեր երկրում բազային թոշակը կազմում է 16 հազար դրամ կամ 33 դոլար։ Հետո գումարվում են ստաժի համար ավելացումները` 800–ական դրամ առաջին 10 տարվա համար ու 500` մնացածի։ Միջին թոշակը կազմում է 41 հազար դրամ կամ 85 դոլար։