ԵՐԵՎԱՆ, 26 հուլիսի — Sputnik. Արարատի մարզի դատախազությունում որոշել են վերսկսել 10 տարվա վաղեմության սպանության գործերի` ժամանակին կարճված վարույթները։ Այս մասին հայտնում է ՀՀ գլխավոր դատախազությունը` նշելով, որ վերաբացված գործերի թիվն այս պահին 10-ն է։
2009թ-ին Ղուկասավան գյուղի մոտ ջրատարում խեղդամահ արված անձի դիակի հայտնաբերման դեպքի վերաբերյալ ուսումնասիրությունները ցույց են տվել, որ ժամանակին ձեռք բերված փաստական տվյալներով տեսանելի են եղել կոնկրետ անձանց կողմից հանցագործությանը հնարավոր առնչություն ունենալու վարկածներ, սակայն այդ ուղղությամբ անհրաժեշտ քննչական և այլ դատավարական գործողություններ չեն կատարվել:
Մեկ այլ` 2011թ.-ին հարուցված քրեական գործով, պարզվել է, որ անհետ կորած անձին հայտնաբերելու ուղղությամբ հանցագործության բացահայտման համար կարևոր նշանակություն ունեցող հնարավոր բոլոր քննչական և այլ դատավարական գործողությունները չեն կատարվել:
Նույն պատճառով չբացահայտված են մնացել նաև 2008թ. Արարատի մարզի Դիտակ-Մխչյան ավտոճանապարհին ավտոմեքենայի մեջ անձի բռնի մահվան հետքերով հայտնաբերված դիակի փաստով հարուցված սպանության և 2013թ.-ին անձի անհետ կորելու վերաբերյալ քրեական գործերը։
Այս բոլոր գործերով որոշվել է վերսկսել քրեական գործերի վարույթները, ևս սպանության դեպքերի ևս 6 քրեական գործերի կասեցված վարույթների վերաբերյալ ուսումնասիրությունները շարունակվում են: