ԵՐԵՎԱՆ, 25 հուլիսի — Sputnik. Հայկական թիմը կմասնակցի Մեխիկոյում կայանալիք First Global ռոբոտների մրցույթին։ Այս մասին այսօր լրագրողներին հայտնեց Առաջատար տեխնոլոգիաների ձեռնարկությունների միության (ԱՏՁՄ) գործադիր տնօրեն Կարեն Վարդանյանը։
Մրցույթը տեղի կունենա օգոստոսի 16–18–ը։ 160 երկրից ժամանած երիտասարդները պետք է ռոբոտ հավաքեն` օգտագործելով իրենց կոնստրուկցիան ու սեփական ալգորիթմը։ Ռոբոտը պետք է կարողանա խորանարդիկներից կոնստրուկցիաներ հավաքել, արևային մարտկոցներ տեղադրել ու հողմային էլեկտրակայան կառուցել։
Թիմը հավաքել են Երևանում ու մարզերում գործող «Արմատ» ինժեներային լաբորատորիաների ուսանողներից։
Նախորդ տարի Վաշինգտոնում անցկացվող մրցույթին մեկնել էին Երևանի «Թումո» տեխնոլոգիական կենտրոնի սաները։
Այս տարի մասնակիցներից չորսը մարզերից են` երկու դպրոցական Սիսիանից, մեկ դպրոցական աղջիկ Գորիսից ու մեկ դպրոցական Արծվաբերդից։
Նշենք, որ հանրապետությունում ավելի քան 200 «Արմաթ» դպրոցական լաբորատորիա կա, որտեղ երեխաները դասերից հետո ինժեներիա ու ծրագրավորում են սովորում։