ԵՐԵՎԱՆ, 25 հուլիսի — Sputnik. ՀՀ վարչապետ Նիկոլ Փաշինյանը կմեկնի Սանկտ-Պետերբուրգ` մասնակցելու ԵԱՏՄ միջկառավարական խորհրդի նիստին (վարչապետների ֆորմատ): Այս մասին նա գրել է ֆեյսբուքյան իր պաշտոնական էջում` մանրամասնելով, թե հատկապես ինչու է ինքը մասնակցում այս նիստին։
«Ինչպես հայտնի է, սահմանադրական փոփոխություններից հետո ձեռք բերած կարգավիճակի բերումով Հայաստանի վարչապետը ներգրավված է ԵԱՏՄ Բարձրագույն տնտեսական խորհրդում՝ երկրների ղեկավարների ֆորմատում և այս հարցը լուծված է նաև դե յուրե, այսինքն՝ այստեղ Հայաստանը շարունակելու է ներկայացնել վարչապետը:
Բայց ԵԱՏՄ միջկառավարական խորհրդի աշխատանքի իրավական կարգավորումները դեռևս չեն համապատասխանեցվել ՀՀ Սահմանադրության նոր տեքստին ու վարչապետների խորհրդի նիստին իմ չմասնակցելու պարագայում որոշումներ չէին կարող ընդունվել և ֆորմատը կաթվածահար կլիներ»,–գրել է Փաշինյանը:
Վարչապետը հիշեցրել է, որ դեռևս Թավշյա հեղափոխության ինքն ասել եմ, որ ԵԱՏՄ-ն կաթվածահար անելը իրենց նպատակը չէ, ընդհակառակը՝ պիտի ամեն ինչ անեն այդ կազմակերպությանը մեր երկրի անդամակցությունն առավել արդյունավետ դարձնելու համար։ Հենց այդ պատճառով նա որոշում է կայացրել Սանկտ-Պետերբուրգ մեկնելու:
Նշենք, որ հուլիսի 26-ին և 27-ին Սանկտ Պետերբուրգում կկայանա Եվրասիական միջկառավարական խորհդրի հերթական նիստը, որը կնախագահի ՌԴ վարչապետ Դմիտրի Մեդվեդևը։
Եվրասիական տնտեսական միության անդամ երկրների կառավարությունների ղեկավարները կքննարկեն ԵԱՏՄ պետությունների թվային զարգացման, էներգետիկայի և տրանսպորտի ոլորտներում փոխգործակցության, արդյունաբերական կոոպերացիայի և մաքսային համագործակցության, ինչպես նաև ԵԱՏՄ իրավանորմատիվային բազան կատարելագործելու հարցերը։