ԵՐԵՎԱՆ, 24 հուլիսի — Sputnik. Քննիչներն արդեն մանրամասներ են պարզել Երևանում հնչած կրակոցների վերաբերյալ, որոնց հետևանքով երիտասարդ է տուժել։
Քննչական կոմիտեի մամուլի ծառայության տարածած հաղորդագրության համաձայն` 2018թ. հուլիսի 23-ին՝ ժամը 23:10-ին, «Էրեբունի» բժշկական կենտրոնից ահազանգ է եղել, որ «ձախ զստային շրջանի հրազենի վնասվածք, տրավմատիկ շոկ» ախտորոշմամբ բուժօգնության է դիմել Երևանի բնակիչը՝ ծնված 1991թ.:
Ձեռնարկված միջոցառումների արդյունքում պարզվել է, որ երիտասարդը վնասվածքն ստացել է «Էրեբունի բժշկական կենտրոնի» մոտակայքում։ Դեպքի վայրի զննությամբ հայտնաբերվել է 9մմ տրամաչափի 3 պարկուճ, որոնք, փորձագետի նախնական դիտարկման համաձայն, ատրճանակի տրավմատիկ պարկուճներ են:
Նույն օրը դեպքի առթիվ ՀՀ ՔԿ Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում հարուցվել է քրեական գործ, ստեղծվել է քննչական խումբ:
Քրեական գործով էական նշանակություն ունեցող հանգամանքները պարզելու նպատակով նշանակվել են դատաբժշկական և դատաքրեագիտական փորձաքննություններ, հարցաքննվել մի շարք անձինք, առգրավվել դեպքի պահին տուժողի հագին եղած հագուստները, ինչպես նաև՝ վիրահատական միջամտության ժամանակ աջ նստային շրջանի կույր վերքից հեռացված 6.5 մմ տրամագծով գնդաձև սև ռետինե գնդակը։
Պարզվել է վիճաբանության շարժառիթը, տվյալներ ձեռք բերվել ենթադրյալ հանցագործություն կատարած անձի ինքնության վերաբերյալ:
Հանձնարարություն է տրվել ոստիկանության համապատասխան ստորաբաժանումներին՝ միջոցներ ձեռնարկել նրան հայտնաբերելու և վարույթն իրականացնող մարմնին ներկայացնելու ուղղությամբ: