ԵՐԵՎԱՆ, 24 հուլիսի — Sputnik. Պաշտպանության բանակն իր զինանոցում հարվածային անօդաչու սարքեր ունի։ Այս մասին այսօր Ստեփանակերտում կայացած ասուլիսի ժամանակ ասաց Արցախի պաշտպանության բանակի հրամանատար գեներալ-լեյտենանտ Լևոն Մնացականյանը։
Դեռ 2017 թվականի սեպտեմբերին ՀՀ պաշտպանության նախարարության Ռազմաարդյունաբերական պետական կոմիտեի նախագահ, պաշտպանության փոխնախարար Դավիթ Փախչանյանը հայտնել էր, որ Հայաստանի Ռազմաարդյունաբերական համալիրը անօդաչու թռչող սարքեր է մշակում։
«Պաշտպանության բանակն ունի Փախչանյանի նշած ԱԹՍ-ից։ Մենք ունենք նաև ԱԹՍ-ների այլ տեսակներ, որոնք մշակման փուլում են», — ասաց Մնացականյանը։
2018 թվականի մարտին Փախչանյանը հայտնել էր, որ Հայաստանն առաջին հերթին պետք է զարգացնի օպտիկական սարքերի, ռոբոտների, ԱԹՍ-ների ու լազերային տեխնիկայի արտադրությունը։
Ավելի վաղ Պաշտպանության նախարարը հայտնել էր, որ 2016 թվականին տեղական արտադրության տեխնիկայի գնումերի ծավալն ավելացել է 23%-ով։