ԵՐԵՎԱՆ, 22 հուլիսի — Sputnik. 102–րդ ռազմաբազայի ստորաբաժանումներն իրականացնում էին մարտական պատրաստվածության միջոցառում, որը տարեկան պլանով համաձայնեցվում է ՀՀ ՊՆ—ի հետ` ճանապարհները բոլորը, տեխնիկայի շարժը տարեկան ծրագրերով պլանավորված է։
Այս մասին այսօր Շիրակի Փանիկ գյուղում կայացած փակ քննարկումից հետո լրագրողներին ասաց ՀՀ ՊՆ Դավիթ Տոնոյանը։ Ինչպես տեղեկացնում է Sputnik Արմենիայի թղթակիցը, հանդիպում–քննարկումը նախարարի և Գյումրիում տեղակայված 102–րդ ռուսական ռազմաբազայի հրամանատար գնդապետ Վլադիմիր Ելկանովի միջև էր` Փանիկում տեղի ունեցածի վերաբերյալ։
«Ծրագրերի շրջանակներում կան տարբեր տեսակի մարզումներ։ Այս մարզումն իրականացրել է հետախուզական ստորաբաժանումը։ Հետախուզական ստորաբաժանման մարզման ընտրության վայրը եղել է սխալ և չհամաձայնեցված։ Բայց մի գաղտնիք բացահայտեմ. քանի որ նրանք հետախույզներ են, իսկ հետախույզները ոչ մի պայմանով չէին բացահայտելու իրենց մարզման վայրը, դրա համար խոսակցությունը եղել է լարված։ Վայրն ընտրվել է սխալ, բայց, չպաշտպանելով հետախույզներին նշեմ, որ նրանք Փանիկին վերաբերել են որպես իրենց աջակցող բնակավայրի, իսկ շարասյունը եղել է որպես հակառակորդի շարասյուն։ Եվ յուրայիններին աջակցող բնակավայրի կողքն էլ իրականացրել են այդ միջոցառումը»,–ասաց Պաշտպանության նախարարը և հավելեց, որ սխալ կա թույլ տված և՛ ռուսական, և՛ հայկական կողմերից։
Տոնոյանի խոսքով` նմանօրինակ միջոցառումներ մեծ քանակությունը երբեմն ստիպում է առօրյա աշխատանքի վրա ուշադրություն չդարձնել։
«Բայց ես պաշտոնապես հայտարարում եմ, որ ռուսական կողմը 1 օր առաջ տեղեկացրել էր շարասյունի տեղաշարժի վերաբերյալ և տեղեկացրել է, որ լինելու է մարզում, բայց մարզման վայրը չէր նշել»,–ասում է նախարարը և հիշեցնում, որ իրենք իրենց սխալն ընդունել են, ներողություն են խնդրել։
Դավիթ Տոնոյանը նշեց նաև, որ հայ-ռուսական բարիդրացիական հարաբերությունները նույնիսկ պայմանագրերով են ամրագրված: Չնայած դրան ՀՀ ՊՆ չի բացառում հայ-ռուսական միջպետական պայմանագրի որոշ դրույթների վերանայումը։
«Դրանք քարի վրա գրված փաստաթղթեր չեն, և ժամանակի ընթացքում առաջանում են խնդիրներ, որոնք պահանջում են պայմանագրաիրավական փոփոխություններ: Իհարկե, դա արվելու է»,-նշեց նախարարը՝ փաստելով, որ օրերս Փանիկում տեղի ունեցած միջադեպը կարող է խթան հանդիսանալ որոշ փոփոխությունների: Դավիթ Տոնոյանը նաև տեղեկացրեց՝ ՌԴ կողմից Հայաստանին 200 մլն դոլարի վարկային ծրագրով մատակարարվող զենք ամբողջությամբ տրամադրվել է:
«200 մլն դոլարի դիմաց տրամադրած զենք-զինամթերքը ժամանակակից, արդիական, անգամ ՌԴ սպառազինության մեջ չգտնվող սպառազինություն է»,-հավելեց նախարարը:
Հիշեցնենք, որ հուլիսի 17-ի առավոտյան, Գյումրիում տեղակայված 102-րդ ռազմաբազայի զինծառայողները զորավարժություն են անցկացրել Արթիկի տարածաշրջանի Փանիկ գյուղի վարչական տարածքում։ Զորավարժություններն ուղեկցվել են կրակոցներով: Այս մասին Sputnik Արմենիային տեղեկացրել էր Փանիկ համայնքի ղեկավար Վարդան Մակեյանը՝ փաստելով, որ երեխաները վախեցել են:
Համայնքապետն անմիջապես այդ մասին տեղեկացրել է Շիրակի մարզային ոստիկանությանն ու Ազգային անվտանգության ծառայությանը:
Ուժային կառույցների աշխատակիցները մեկնել էին գյուղի տարածք` իրավիճակին ծանոթանալու։
Հուլիսի 18-ին մարզպետն ընդունել է ռազմաբազայի անձնակազմի գծով հրամանատարի տեղակալ Ալեքսեյ Պալյուխովիչին: «Հանդիպման ընթացքում ասացին, որ եղել է ֆորս մաժորային իրավիճակ: Հրամանատարության կողմից հրաման չի եղել:
Վստահեցրին, որ հաջորդ անգամ չի կրկնվի և ներողություն խնդրին բնակիչներից կատարվածի համար՝ նշելով, որ սա նմանատիպ առաջին դեպքն է և որ մեղավորները պատասխան են տալու»,-ասել է Շիրակի մարզպետը և հիշեցրել, որ հայ-ռուսական միջպետական պայմանագրով էլ է նախատեսված նման միջոցառումների, վարժանքների դեպքում նախապես տեղեկացնել մարզպետին և համայնքի բնակիչներին: