Այս տարվա միջոցառմանը, որի մասնակիցների թիվը հասնում էր մոտ 2000-ի, ներկա էին «Project 12», «The Windrose», «Allianplace» բենդերն ու «Նեմրա» ռոք խումբը, DJ-ներ:
Ինչպես լրագրողների հետ զրույցում նշեց «Յել էքստրիմ Պարկի» համահիմնադիր Տիգրան Չիբուխչյանը, ակտիվ հանգստի գոտին տարեցտարի ձգտում է առաջին հերթին ստեղծել լավ մթնոլորտ ու ձևաչափային միջոցառումների օգնությամբ աշխուժություն բերել Ենոքավան համայնքին:
«Մեր այս միջոցառումը դարձել է սպասված, 3 տարի շարունակ ունենում ենք մեծ թվով հյուրեր, ընդլայնվում է մեր գործընկեր կազմակերպությունների թիվը ևս: Մասնակցում են ընտանիքներով, ընկերներով, տուրիստական խմբերով: Սա մեզ համար արդեն գնահատական և հաջողություն է. նշանակում է, որ այն գրավիչ է և հետաքրքիր է թե´ հյուրերի, թե´ գործընկերների համար», —նշեց Չիբուխչյանը:
YELL MAGIC BIRTHDAY տոնական շոու ծրագրի ավարտին բոլոր հյուրերը համտեսեցին «Յել էքստրիմ Պարկի» ծննդյան տորթը: Իսկ բոլոր նրանք, ովքեր գիշերեցին վրաններում, ավանդական խարույկի շուրջ վայելեցին միջոցառման հատուկ հյուրի՝ Ռուբեն Հախվերդյանի երգերը:
Նախագիծը սկիզբ էր առել հենց զիփլայնից, պլաններում կար կառուցել աշխարհում ամենաերկար զիփլայնը, ինչի նպատակով նույնիսկ համացանցում դրամահավաք էր սկսվել: Սակայն, մինչ ընթանում էին նախագծի նախապատրաստական աշխատանքները, կառուցվեցին Դուբայի, ապա Հարավային Կորեայի զիփլայները:
Սակայն նախատեսվող զիփլայնը՝ 2400 մետր երկարությամբ, կընգրկվի աշխարհի տասը ամենաերկարների շարքում:
Նախագծի հեղինակի խոսքերով` անցյալ տարի «Յել էքստրիմ Պարկ» է այցելել շուրջ 55 հազար մարդ: Այս տարի ակնկալվում ունենալ շուրջ 68 հազարի այցելու: