ԵՐԵՎԱՆ, 21 հուլիսի — Sputnik. ԱԺ նախկին պատգամավոր, «Երդվյալ ազատամարտիկների միության նախագահ Ռուբեն Գևորգյանը վագրեր է պահում։ Ավելին, նա բուծում է, և գեներալ Մանվելի վագրն էլ ինքն է տվել։ Այս մասին գրում է «Հրապարակ» օրաթերթը։
«Մեզ հետ զրույցում նա նախ զայրացավ հարցից, պահանջեց չձայնագրել խոսքը, հետո խոստովանեց, որ ժամանակին 2 վագր է բերել դրսից, որոնք ձագեր են ունեցել, հիմա 25, թե 27 վագր ունի»,- նշված է հոդվածում։
«Փաստորեն վագրեր եք բուծու՞մ»,- հարցրել է լրագրողը։
«Չէ, ես վագրեր չեմ բուծում, բուծելն էն է, որ վագրերին վաճառում ես։ Ես հո կոլխոզ չեմ, որ վագր բուծելով զբաղվեմ։ Ես որ վագրերին նայում եմ, հանգստանում եմ, առօրյա անցուդարձից կտրվում եմ»,- պատասխանել է Գևորգյանը։
Հիշեցնենք, որ գեներալ Մանվել Գրիգորյանի առանձնատանը հայտնաբերված վագրն այժմ Երևանի կենդանաբանական այգում է։