ԵՐԵՎԱՆ, 20 հուլիսի — Sputnik. Տնտեսական մրցակցության պաշտպանության պետական հանձնաժողովը որոշել է 10 միլիոն դրամով տուգանել «Ա և Գ» ընկերությանը` կեղծ օղի արտադրելու և իրացնելու համար։ Այս մասին հայտնում են հանձնաժողովի մամուլի ծառայությունից։
Վարույթը հարուցվել է «NEMIROFF» («ՆԵՄԻՐՈՖՖ») օղի արտադրող ուկրաինական «Նեմիրոֆ Ինթելեքթյուըլ Փրոփըրթի Իսթեբլիշմնթ» ընկերությունից ստացված դիմում-բողոքի հիման վրա։ Դիմումատուն հայտնել է, որ հայկական շուկայում առկա են նշված ապրանքային նշանով կեղծ օղիներ:
Հանձնաժողովը պարզել է, որ սպիրտային խմիչքների շրջանառության ոլորտում գործող «Ա և Գ» ընկերությունն արտադրում և իրացնում է «NEMIROFF» ապրանքային նշանով՝ «Український мед» անվանումով օղիներ:
Հանձնաժողովը հայտնում է նաև, որ «Ա և Գ» ընկերությունը նախկինում ևս այլ օղիների կեղծման փաստերով հայտնվել է ՏՄՊՊՀ-ի տեսադաշտում: 2016 թ-ին երկու անուն օղիների վերաբերյալ անբարեխիղճ մրցակցության համար նույն ընկերությունը տուգանվել է 10 մլն դրամով` 5 մլն դրամ` յուրաքանչյուր տեսակի դիմաց:
Նշենք, որ «Ա և Գ» ընկերությունը կապվում է «Ալեքս Գրիգ» ընկերության սեփականատեր, ԱԺ ՀՀԿ խմբակցությունից դուրս եկած պատգամավոր, գործարար Սամվել Ալեքսանյանի հետ։
Ի դեպ, ՀՀ կառավարության էլեկտրոնային ռեգիստրի համակարգում որպես «Ա և Գ» ընկերության սեփականատերեր են նշված ՀՀ քաղաքացի Մանուկյան Վիկտորը, ՌԴ քաղաքացի Պաշկո Սերգեյը, ՀՀ քաղաքացի Վիկտոր Մանուկյանը։ Սակայն նրանց բոլորի անվան դիմաց կա «մասնակցությունը դադարեցված է» գրառումը։
Ընկերության գործող սեփականատիրոջ վերաբերյալ որևէ տվյալ չկա։
Նույն աղբյուրի համաձայն` «Ա և Գ» ՍՊԸ-ն պետական գրանցում է ստացել 2009թ-ին։