ԵՐԵՎԱՆ, 20 հուլիսի — Sputnik. «Ժողովուրդ» թերթը գրում է. «Ոստիկանապետ Ալիկ Սարգսյանի կռիվը նոր թափ է ստանում: Ինչպես հայտնի է, Ալիկ Սարգսյանը իրավապահներին հայտնել էր, որ նախկին մարզպետը 2012թ. իրենից 60 000 դոլար է պահանջել՝ սպառնալով նրա վերաբերյալ արատավորող տեղեկություններ հրապարակել:
Վարդգես Հովակիմյանն էլ իրավապահներին հայտնել է, թե ոչ միայն Ալիկ Սարգսյանից գումար չի պահանջել, այլև ինքն է նրան տվել՝ որպես կաշառք այն ժամանակ, երբ Սարգսյանը ոստիկանապետի պաշտոնն էր զբաղեցնում:
Իսկ գումարը տվել է իր նախկին աշխատակցի որդուն ոստիկանության համակարգում աշխատանքի ընդունելու համար, սակայն Սարգսյանը խոստումը չի կատարել, գումարն էլ չի վերադարձրել: Ինչևէ, «Ժողովուրդ» օրաթերթը ՀՀ ոստիկանապետ Վալերիյ Օսիպյանից փորձել է պարզել, թե արդյոք նա տեղյակ է եղել այս պատմությունից ու փորձե՞լ է պարզել իրականությունը:
Ի պատասխան՝ ՀՀ ոստիկանապետը հայտնել է. «Ընդամենը երեկ երեկոյան եմ տեղեկացել խնդրի մասին և այն էլ լրահոսից»: