ԵՐԵՎԱՆ, 19 հուլիսի — Sputnik. Հայաստանի դպրոցներին թույլ չեն տա աշակերտների որոշ քանակից ավելի շատ մարդ ընդունել։ Այս մասին այսօր՝ կառավարության նիստից հետո լրագրողների հետ զրույցում նշեց Կրթության եւ գիտության նախարար Արայիկ Հարությունյանը:
Ապագայում նախարարությունն ուզում է անցնել դպրոցների լիցենզավորմանը, որ հստակ նշվի` քանի աշակերտ կարող է ընդունել յուրաքանչյուր դպրոց։
«Իսկ եթե դպրոցը թույլատրելի քանակից ավելի շատ աշակերտ ընդունի, կարող են պարզապես արգելել նոր աշակերտների ընդունումը, քանի դեռ մնացածը չեն ավարտել դպրոցը», – ավելացրեց նա։
Հիմա կան դպրոցներ, որտեղ աշակերտների պակաս կա, իսկ մյուս դպրոցներում այնքան շատ երեխա կա, որ դասերը երկու հերթով են անցկացվում։ Որպես կանոն, այդ դպրոցները քաղաքի կենտրոնում են ու դեռ խորհրդային ժամանակներից հեղինակավոր են համարվում։
Հարությունյանը համոզված է, որ եթե աշակերտներին ավելի հավասար բաշխեն դպրոցներով, մրցակցությունն էլ կավելանա։