ԵՐԵՎԱՆ, 19 հուլիսի — Sputnik. Հայաստանի նախագահ Արմեն Սարգսյանը Վիկտոր Համբարձումյանի անվան Բյուրականի աստղադիտարանի հետ կապված հուշեր շատ ունի։ Հենց այստեղ է անցել նրա կյանքի մի մասը։ Այս մասին նախագահն ասաց Sputnik Արմենիայի թղթակցի հետ զրույցում։
Ավելի վաղ Հայաստանի նախագահը երեխաների հետ ուսումնասիրել էր աստղերը։ Միջոցառմանը մասնակցել էին մոտ 50 երեխա, այդ թվում` հաշմանդամություն ունեցող։
«Կյանքիս մի մասն անցել է Բյուրականի աստղադիտարանում։ Առաջիկայում ծրագրում եմ այցելել աստղադիտարան, որպեսզի հասկանամ` ինչ վիճակում է այդ ոլորտը», — ասաց Սարգսյանը։
Նախագահը նշեց, որ այս հարցում իր տեսլականն ունի, քանի որ մասնագիտությամբ ֆիզիկոս է։ Նա վստահ է, որ ցանկացած ոլորտում պետք է առաջ ընկել ժամանակից։
«Երբ ստեղծվում էր Բյուրականի աստղադիտարանը, այն հագեցած էր լավագույն հեռադիտակներով։ Այսօր մենք ունենք դպրոց, լավ ավանդույթներ, տաղանդավոր երիտասարդություն, սակայն չկան մեր դարին համապատասխանող միջոցներ», — ասաց նախագահը։
Սակայն դա էլ նախագահի համար խնդիր չէ, նա կարծում է, որ այս գործում կարևոր է որակյալ կրթությունը և ցանկությունը։ Հայաստանը կարող է դառնալ բարձր տեխնոլոգիաների երկիր, եթե զարգանա ֆունդամենտալ գիտությունը։
Սարգսյանը մասնագիտությամբ ֆիզիկոս է։ Նա երկար տարիներ ուսումնասիրել է հարաբերականության տեսությունը, տիեզերաբանությունը, ռելյատիվիստական աստղաֆիզիկան։ Նախագահը նշում է, որ այդ գիտելիքներն օգնել են իրեն ներկա գործունեության մեջ` առաջին հերթին տալով մտածելու դիսցիպլին։
Ավելի վաղ Սարգսյանը միջազգային գիտական կենտրոնների հետ համագործակցելու հարցում հայ գիտնականներին աջակցելու պատրաստակամություն էր հայտնել։