ԵՐԵՎԱՆ, 18 հուլիսի — Sputnik. «Մինաս Ավետիսյան» հիմնադրամը կոչ է անում դադարեցնել Մեղրիի 17-րդ դարի Սուրբ Հովհաննես եկեղեցու տարածքում որմնանկարների վերականգնումը։ Այս մասին այսօր կայացած ասուլիսի ընթացքում ասաց հիմնադրամի ղեկավար Ազատ Թովմասյանը։
Թովմասյանի խոսքով` դեռ 2016թ-ին Հայաստանի մշակույթի նախարարությանն առընթեր ՊՈԱԿ-ն անօրինական ձևով դրամաշնորհ է ստացել ԱՄՆ-ի դեսպանի` Մշակութային արժեքների պահպանության հիմնադրամից, և այդ դրամաշնորհը տրամադրվել է Մեղրիում որմնանկարների վերականգնմանը։ Նա պնդում է, որ մրցույթի անցկացման մասին չեն տեղեկացվել բոլոր շահագրգիռ կողմերը, իսկ ներկայացված նախագիծը կարող է վնասել որմնանկարները։ Միաժամանակ նա համոզված է, որ մշակույթի նախկին նախարար Հասմիկ Պողոսյանը և գերատեսչության մյուս աշխատակիցները հիանալի իմացել են, որ մրցույթը տեղի է ունեցել կոպիտ խախտումներով։
Որմնանկարների վերականգնման մասնագետ Մարինա Գևորգյանն էլ պնդում է, որ այս հարցով բազմիցս դիմել է նախարարություն, բայց ապարդյուն։ Նրա խոսքով` մեկ այլ նախկին նախարար Արմեն Ամիրյանը խոստացել է լուծել խնդիրը, բայց այդպես է ոչինչ չի արել։ Նախարարության նոր ղեկավարը` Լիլիթ Մակունցը, առայժմ չի արձագանքել հանդիպման խնդրանքին։
Sputnik Արմենիայի հետ զրույցում մշակույթի նախարարության հասարակայնության հետ կապերի բաժնի ղեկավար Ալլա Սերոբյանը հավաստիացրեց, որ հիմնադրամի ներկայացուցիչների հետ հանդիպումը չի կայացել Մակունցի զբաղվածության պատճառով։ Արդեն հուլիսի 26-ից ընդունելությունների օրեր կլինեն, և նախարարը կլսի բոլորին։
Sputnik Արմենիան մեկնաբանության համար դիմեց նաև Հայաստանի մշակույթի նախարարության Պատմության և մշակույթի հուշարձանների պահպանության գործակալության պետ Արմեն Աբրոյանին։
Նա հայտնեց, որ պատրաստ է անձամբ լսել հիմնադրամի նկատմամբ պահանջների մասին որմնանկարների կամ վերակառուցման գործընթացի վերաբերյալ։ Բայց նա խորհուրդ տվեց մրցույթի անցկացման օրինականությանը վերաբերող հարցերը տեղափոխել իրավական հարթություն։
«Եթե իրավական հիմք լինի, մենք կկարողանանք դադարեցնել աշխատանքները, բայց հիմա այդ հիմքը չկա», — ասաց Աբրոյանը։
Նա ավելացրեց, որ որմնանկարների վերականգնումը շարունակվում է, և նախարարությունը պարբերաբար տեղեկություն է ստանում աշխատանքների որակի և ընթացքի մասին։
Մեղրիի «Փոքր թաղի» Սուրբ Սարգիս եկեղեցին 17-րդ դարի հայկական ճարտարապետության ինքնատիպ կառույց է: Իր ոճով եզակի կառույց է Կովկասում և Միջին Արևելքում, հարուստ է որմնանկարներով, որոնցում զուգորդված են ուշ միջնադարյան քրիստոնեական պատկերագրության տարրերը: Դժբախտաբար ինչպես կառույցը, այնպես էլ որմնանկարներն անմխիթար վիճակում են։ ԱՄՆ-ի դեսպանատունը եկեղեցու վերակառուցման համար հատկացրել է 450 հազար դոլար։ Այդ միջոցների մի մասը ուղղվել է որմնանկարների վերականգմանը։