ԵՐԵՎԱՆ, 17 հուլիսի — Sputnik. Պետական պահպանության գլխավոր վարչության Իջևանի պահպանության բաժնում, Տավուշի և Դիլիջանի պահպանության բաժանմունքներում իրականացված աուդիտների ընթացքում ֆինանսական խախտումներ են ի հայտ եկել։
Այս մասին տեղեկացնում են Ոստիկանության հասարակայնության հետ կապերի և լրատվության վարչությունից։
Իրավապահ կառույցի ներքին աուդիտի վարչության կողմից ներքին անվտանգության վարչությունում կատարված ծառայողական քննությամբ պարզվել է, որ Իջևանի պահպանության բաժնի նախկին հաշվապահը նույն բաժնի նախկին պետին և մի քանի ծառայողների, որոշակի ժամանակահատվածում, ոստիկանության ՊՊԳՎ արտաբյուջետային միջոցներից ընդհանուր 38.493.681 դրամից ավելի գումարներ է վճարվել, որոնք յուրացվել են։
Դրանց մի մասը վերականգնվել է աուդիտի, իսկ մյուս մասը՝ ծառայողական քննության ընթացքում։
Բացի այդ, Դիլիջանի պահպանության բաժանմունքի հաշվապահի պարտականությունները ժամանակավոր կատարելիս, Իջևանի պահպանության բաժնի նախկին հաշվապահը 2017 թվականի մայիս-օգոստոս ամիսներին իրեն նախատեսվածից ավելի վճարել է 4.522.448 դրամ. այս գումարը վերականգնվել է ամբողջությամբ։
Տավուշի պահպանության բաժանմունքի նախկին հաշվապահը 2016 թվականի և 2017 թվականի հունվար-նոյեմբեր ամիսների ընթացքում իր աշխատավարձի հաշվեհամարին ավելի է վճարել ընդհանուր 380.857 դրամ, որը հետագայում վերականգնվել է ամբողջությամբ։
Ընդհանուր վերականգնված գումարը կազմում է 43.396.986 դրամ։
Ոստիկանության ներքին անվտանգության վարչության ծառայողական քննության նյութերն ուղարկվել են ՀՀ հատուկ քննչական ծառայություն՝ արարքներին քրեաիրավական գնահատական տալու համար։