Լաուրա Սարգսյան, Sputnik Արմենիա. Ոսկեպար–Նոյեմբերյան միջպետական ճանապարհը գրեթե անճանաչելի է, արևի տակ պսպղում է հենց նոր լցված ասֆալտբետոնային ծածկույթը։ Աշխատողներն անընդհատ կանգնեցնում են մեքենաները, բայց ոչ երկար։
Աշխատողներից մեկը` Հովհաննեսը (անունը փոխված է) սաղավարտով և ժիլետով է, նա հեռախոսով հարցնում է գործընկերներին, որոնք մի քիչ այն կողմ են աշխատում, թե վարորդները երբ կկարողանան շարունակել ճանապարհը։ Այդ ընթացքում մենք մի քիչ զրուցում ենք Հովհաննեսի հետ, որն այդ հատվածում համակարգում է երթևեկությունը։
«Աշխատում եմ արդեն երկու շաբաթ։ Ամեն ինչ որակով ենք անում, հիմա փռում ենք ասֆալտի առաջին շերտը, տեղ–տեղ մաքրում ենք հնից։ Նման ճանապարհ նույնիսկ հարևանները չեն ունենա», – ժպտում է Հովհաննեսը` ուղղելով սաղավարտը։
Մեր զրույցն ընդհատում է զանգը։ Հովհաննեսին հաղորդում են, որ ճանապարհը բաց է, և մեքենաների շարանը շարժվում է դեպի վրացական սահման։
Ամենակարևոր միջպետական մայրուղիներից մեկի հատվածը վերականգնելու աշխատանքը սկսվել է երկու ամիս առաջ։ Շատերը Հայաստանում կապել են այդ իրադարձությունը Նիկոլ Փաշինյանի պաշտոնավարման հետ։ Լուրեր են պտտվել, որ վարչապետը արագ կարգադրություն է տվել ճանապարհի շինարարության մասին։ Սովորական քաղաքացիների այդ վարկածը նախարարությունում հերքեցին։
«Ճանապարհների շինարարության կամ վերակառուցման մասին հարցը չի լուծվում մի օրում։ Շինարարական աշխատանքները ծրագրվել են դեռ անցյալ տարի», – Sputnik Արմենիայի թղթակցի հետ զրույցում ասաց Հայաստանի տրանսպորտի, կապի և տեղեկատվական տեխնոլոգիաների նախարարության մամուլի քարտուղար Անահիտ Առաքելյանը։
Աշխատանքները սկսվել են միջպետական ճանապարհի երեք առանձին հատվածներում, դրանց ընդհանուր երկարությունը 18,3 կմ է։ Մի տեղում դեռ հիմք են դնում, մյուս հատվածում` վնասված ճանապարհածածկը վերականգնում են սառը վերամշակման օգնությամբ։
Այստեղ աշխատող Աբգար Հովհաննիսյանը` աշխղեկը, Sputnik Արմենիայի թղթակցի հետ զրույցում հաստատեց, որ ամեն ինչ ընթանում է ըստ ծրագրի և կարելի է ասել, որ բանվորները նախագիծը հանձնելու ժամկետից առաջ են ընկնում։
«Որակի կամ ժամկետների վերաբերյալ ոչ մի բողոք չկա։ Մենք փռել ենք ծածկույթի առաջին շերտը Ոսկեպար–Կիրանց ճանապարհի 6–կիլոմետրանոց հատվածում, այնուհետև ևս 8 կմ մի ուղղությամբ և երկու` հակառակ», – ասաց Հովհաննիսյանը։
Ընդհանուր առմամբ կասֆալտապատվի Սարի գյուղից մինչև Նոյեմբերյան տանող ճանապարհը։ Դրանից հետո կդրվի երկրորդ շերտը, բացատրեց աշխղեկը։
Մինչ հանրությունը գուշակում է, թե ով է նախաձեռնել վերանորոգումը, վարորդներն ուրախանում են փոփոխություններով։ Հարթ ճանապարհի համար ամենից շատ ուրախ են ընկերությունների վարորդները, որոնք կանոնավոր ուղևորափոխադրումներ են կատարում Երևանից Թբիլիսի և հակառակ ուղղությամբ։
«Ճանապարհը շատ կարևոր է, քանի որ այսօրվա դրությամբ դա Հայաստանից Վրաստան միակ օպտիմալ երթուղին է», – Sputnik Արմենիայի թղթակցի հետ զրույցում ասաց Միքայելը, ուղևորափոխադրումներով զբաղվող ընկերության տնօրենը։
Այն իրավիճակում, երբ Վանաձոր–Ալավերդի–Վրաստանի սահման մայրուղու երթևեկությունը սահմանափակ է սողանցքից հետո, որը տեղի է ունեցել այս տարվա հունիսին, Ալավերդու ճանապարհահատվածը վերանորոգվում է, դեպի Վրաստան առավել հարմար ուղին անցնում է հենց Գեղարքունիքի և Տավուշի մարզերով։
«Վրաստան կարելի է գնալ նաև Ապարանի կողմով, բայց ճանապարհը երկարում է այն պատճառով, որ Ալավերդու հատվածը ժամանակավորապես փակ է և պետք է շրջանցել Ստեփանավանով և Օձունով», – բացատրեց Միքայելը։
Այսպես հա՛մ վառելիքի ծախսն է ավելանում, հա՛մ ուղևորների դժգոհությունն աճում։ Ամենից շատ Հայաստանի ճանապարհներից բողոքում էին Վրաստանից եկողները։ Միքայելը կարծում է, որ հիմա նրանք էլ գոհ կլինեն։