ԵՐԵՎԱՆ, 12 հուլիսի — Sputnik. Ադրբեջանական ցանկացած հարձակում Հայաստանի դեմ հարձակում է նաև ժողովրդավարության դեմ։ ՀՀ արտաքին գործերի նախարարի տեղակալ Ռուբեն Ռուբինյանը հայտնում է, որ այս մասին Բրյուսելում ասել է վարչապետ Փաշինյանը։
Ռուբինյանը գրառում է արել ֆեյսբուքյան իր էջում` Փաշինյանի այս հայտարարությունը որակելով որպես միջազգային հանրությանն ուղղված կարևոր ուղերձ։
«Սա շատ կարևոր շեշտադրում է ու շատ կարևոր ուղերձ, որովհետև ղարաբաղյան հակամարտությունը ու դրանից բխող մշտական սահմանային լարվածությունը, որքան էլ Ադրբեջանն այն փորձի ներկայացնել որպես այդպիսին, իր էությամբ պարզապես տարածքային վեճի արդյունք չէ։ Սա հակամարտություն է ժողովրդավարության ու բռնապետության, ազատ ինքնորոշման ու գերության, կառուցողականության ու ռազմատենչության, առաջադիմության ու հետադիմության միջև»,- գրում է փոխնախարարը։
Ռուբինյանի համոզմամբ` հենց սա պիտի ըմբռնի միջազգային հանրությունն ու սկսի գործել այդ իրողությանը համապատասխան։