ԵՐԵՎԱՆ, 11 հուլիսի — Sputnik. Զբոսաշրջության կոմիտեի նախագահի առաջին տեղակալ Մեխակ Ապրեսյանը հրաժարական է տվել։ Այս մասին նա գրել է ֆեյսբուքյան իր էջում։ Դիմելով բոլոր նրանց, ովքեր գործի բերումով իր հետ առնչվել են, նաև իր ընտանիքին նա շնորհակալություն է հայտնել երկար համագործակցության համար։
«Այսօր ես ՀՀ տնտեսական զարգացման և ներդրումների նախարարության զբոսաշրջության կոմիտեի նախագահի տեղակալի պաշտոնավարումս թողնելու դիմում եմ ներկայացրել։
Այս տարի լրացել է նախարարությունում իմ աշխատանքի 20 տարին։ 2005-2016 թվականներին ղեկավարել եմ նախարարության Զբոսաշրջության վարչությունը, իսկ 2016 թվականից, երբ ստեղծվեց Զբոսաշրջության պետական կոմիտեն, հանդիսացել եմ կոմիտեի նախագահի տեղակալը։ 2013 թվականից Զբոսաշրջության իրավաբանների միջազգային ֆորումի (IFTTA) անդամ եմ։
Ես յուրաքանչյուրիցդ սրտանց շնորհակալություն եմ հայտնում այս երկար տարիների համագործակցության, համատեղ աշխատանքի ու ջանքերի համար՝ ի նպաստ մեր Հայրենիքի բարօրության։
Մեր համատեղ նվաճումների ու ձեռքբերումների, ինչպես նաև իմ բացթողումների մասին կդատեք ինքներդ»,–գրել է Ապրեսյանը ֆեյսբուքյան իր էջում։։
Նա նաև հույս է հայտնել, որ գործընկերները կաջակցեն Զբոսաշրջության կոմիտեին իր արդյունավետ գործունեությունն իրականացնելու հարցում։