ԵՐԵՎԱՆ, 10 հուլիսի — Sputnik. «Զինվորական ծառայության և զինծառայողի կարգավիճակի մասին» օրենքում առաջարկվող փոփոխություններով կառավարությունն առաջարկում է զինվորական ծառայությունից ազատել ընտանիքի միակ արու զավակ այն զորակոչիկին, որի ծնողը, եղբայրը կամ քույրը զոհվել է Հայաստանի զինված ուժերի կազմում մարտական գործողությունների կամ միջազգային պայմանագրերով օտարերկրյա պետությունների զինվորական ստորաբաժանումներում զինվորական ծառայության ընթացքում:
ՀՀ կառավարությունն այս փոփոխությունն ավելի շատ բարոյական, քան իրավական կարգավորում է համարում: Այս մասին այսօր ԱԺ պաշտպանության և անվտանգության հարցերի մշտական հանձնաժողովում ասաց պաշտպանության նախարարի տեղակալ Գաբրիել Բալայանը:
«Կարծում եմ` սա պետության բարոյական պարտավորությունն է: Եթե ընտանիքն արդեն զոհ է տվել, և մեկ արու զավակ է մնացել, պետական իշխանությունը որոշակի բարոյական պարտավորվածություն ունի նրանց նկատմամբ և պարտավոր է այն օրենքով ամրագրել», — ասաց նա:
Հանձնաժողովի նախագահ Կորյուն Նահապետյանն էլ հետաքրքվեց, թե օրենքի ընդունման արդյունքում քանի նման զորակոչիկ կազատվի զինծառայությունից,
Պարզվեց` նրանց թիվը մեծ չէ և տարեցտարի նվազում է:
Գաբրիել Բալայանը հայտնեց, որ 2013 թվականին նման ընտանիքների զորակոչված միակ արու զավակները 26-ն են եղել, 2014-ին՝ 23-ը, 2015-ին՝ 11-ը, 2016-ին՝ 18-ը, իսկ 2017-ին՝ 16-ը:
Այս տարի ամառային զորակոչի ընթացքում զորակոչվող այդպիսի 7 զինապարտ կա:
Նախագիծն ԱԺ քննարկմանը կներկայացվի վաղը`հուլիսի 11-ին, ԱԺ արտահերթ նիստում: