ԵՐԵՎԱՆ, 9 հուլիսի – Sputnik. Վրաստանում ամերիկացի ընտանիքի սպանության մեղադրանքով 19–ամյա հովիվի են ձերբակալել։ Այս մասին հայտնում է ՌԻԱ Նովոստին` հղում անելով երկրի իրավապահ մարմիններին։
Ավելի վաղ` հուլիսի 6–ին, «112» արտակարգ իրավիճակների գործակալությունն ահազանգ է ստացել Վրաստանի ու ԱՄՆ–ի քաղաքացիություն ունեցող զույգի, նաև նրանց երեխայի անհետացման մասին։ Նրանց գտնել էին Դուշեթի շրջանի (Մցխեթ-Մթիանեթ մարզ) Խադա ձորում։
Ծկերե գյուղում ոստիկանությունը հայտնաբերել է կորածների մեքենան ու նրանց իրերը, իսկ երեք կիլոմետր հեռավորության վրա` ջրվեժի ստորոտին, ծնողներից մեկի մարմինը։
Շաբաթ օրը ծնողներից մյուսին նույնպես մահացած են գտել, երբ վերականգնվել են որոնողական աշխատանքները։ Մարմինը ջրվեժի մոտակայքում էր` ձորում։
Երեխային գտնելու որոնողական աշխատանքները մի քանի օր ևս շարունակվեցին։ Երիտասարդ հովիվը օգնեց փրկարարներին գտնել երեխայի մարմինը։ Հենց նա էր սպանության միակ կասկածյալը։
Լարա ու Ռայան Սմիթները ԱՄՆ–ից Վրաստան էին տեղափոխվել մի քանի տարի առաջ ու ապրում էին Մառնեուլիի շրջանում (Քվեմո Քարթլիի մարզ)։
Ադրբեջանական ԶԼՄ–ների տվյալներով` Սմիթը Վրաստանում ReWoven նախագծի հիմնադիր ու ղեկավարն էր։ Նախագիծը զբաղվում էր Վրաստանում ադրբեջանական գորգագործության հանրահռչակմամբ։
Sputnik Գրուզիան գրում է, որ ի սկզբանե քննությունը դժբախտ պատահարի վարկածն էր դիտարկում, սակայն ավելի ուշ կանխամտածված սպանության կասկած առաջացավ։
«Քննությունը պարզել է, որ հուլիսի 4–ին Խադա ջրվեժի մոտակայքում, Մ.Կ.–ն որսորդական հրացանից մահացու կրակոց է արձակել Ռ.Ս.–ի ու նրա երեխայի ուղղությամբ, իսկ Լ.Ս.–ն ձորն է ընկել, երբ փորձել է փախչել ու տեղում մահացել է», – նշվում է Վրաստանի ՆԳՆ–ի հաղորդակցման մեջ։
«Րեգինֆո» պարբերականի խմբագիր Գելե Մտիվլիշվիլիին տեղացիները պատմել են, որ ԱՄՆ քաղաքացիներ Ռայան ու Լարա Սմիթն իրենց 4 տարեկան երեխայի հետ Ծկերե գյուղի մոտակայքում են կանգ առել։ Նրանք վրան են խփել կամրջի մոտ Խադա ձորում, իսկ ջրվեժի մոտ նրանց ուղեկցել է տեղաբնակ հովիվը։
Հայտնում են, որ էքսկուրսիայի ընթացքում զբոսաշրջիկների ու հովիվի միջև վեճ է ծագել։
«Ասում են` զբոսաշրջիկը հարվածել է հովվին, ու նա ստիպված է եղել կրակել։ Նա (հովիվը–խմբ.) օգնել է կնոջը, որը լուսանկարվելիս քիչ էր մնում ընկներ ժայռից։ Ամերիկացին կարծել է, թե հովիվը ձեռ է գցում իր կնոջն ու հարվածել է նրան։ Հովիվը ասում է, որ ստիպված էր կրակել», – պատմում է տեղացի կինը։
Նրա խոսքով` սպանությունից հետո հովիվը թաքցրել է երեխայի մարմինը, իսկ երբ որոնողական աշխատանքը սկսվել է, միացել է դրան։
Սկզբում քննությունը սկսվել էր երկու կամ ավելի անձանց անզգուշությամբ մահ պատճառելու հոդվածով, սակայն հետո վերաորակավորվել է ծանրացնող հանգամանքներով սպանության։ Ձերբակալվածին ցմահ բանտարկություն է սպառնում։