ԵՐԵՎԱՆ, 9 հուլիսի — Sputnik. Արգենտինահայ գործարար Էդուարդո Էռնեկյանն ուզում է նոր բիզնես կենտրոնի նախագիծ իրականացնել Երևանի կենտրոնում` Հայաստանի ԱԳՆ-ի նախկին շենքում։ Այդ մասին երկուշաբթի լրագրողներին ասաց Հայաստանում Արգենտինայի դեսպան Գոնզալո Ուրիոլաբեիտիան։ Նրա խոսքով` նախագիծը թույլ կտա ավելացնել Հայաստանում արգենտինական ներդրումների ծավալները։
Դիվանագետը նշեց նաև այլ ներդրումային նախագծեր, որոնք հետաքրքիր են արգենտինական կողմին. Տավուշի մարզում ջերմոցային տնտեսությունների ընդլայնումը, որտեղ կան արդեն ավելի քան 100 այդպիսի տնտեսություններ, ինչպես նաև ապրանքաշրջանառության խորացումը։
Ուրիոլաբեիտիան հիշեցրեց, որ վերջին 20 տարիների ընթացքում հայ-արգենտինական ապրանքաշրջանառությունը զրոյից հասել է 8 միլիոն դոլարի։ Նա նշեց, որ առևտրատնտեսական համագործակցության հետագա զարգացման համար կան օբյեկտիվ խոչընդոտներ, ինչպիսիք են երկրների աշխարհագրական դիրքը, Հայաստանի` ծովի ելք չունենալը և սահմանափակ շուկան։ Ինչպես նշեց դեսպանը, այնուամենայնիվ, դա ոչ թե հուսահատվելու պատճառ է, այլ խնդրի լուծման ստեղծարար ուղիներ որոնելու առիթ։