ԵՐԵՎԱՆ, 6 հուլիսի — Sputnik. Նախիջևանի սահմանի ակտիվությամբ Ադրբեջանն օգնում է Հայաստանին միայն իր անունից հանդես գալ արցախյան բանակցություններում։ Այս մասին լրագրողներին ասաց Ալեքսանդր Մանասյանը։
Մանասյանը նշեց, որ արցախյան հակամարտության խաղաղ կարգավորման բանակցությունները նոր փուլ են մտել այն բանից հետո, երբ ՀՀ իշխանությունները` վարչապետ Նիկոլ Փաշինյանի գլխավորությամբ, հայտնեցին, որ այլևս չեն պատրաստվում բանակցել Ստեփանակերտի փոխարեն։
Քաղաքագետի կարծիքով` եթե Հայաստանի նոր իշխանություններն ասում են, որ չեն նստելու բանակցությունների սեղանի շուրջ Արցախի փոխարեն, դա նշանակում է, որ Հայաստանը բանակցային գործընթացում ինքն իրեն է ներկայացնելու:
«Այստեղ էլ վտանգ կա, որ Հայաստանը կարող է դառնալ հակամարտության կողմ: Մի բան, որը հենց Բաքվի նպատակն է: Պետք է լավ մշակվեն այդ բանաձևերը: Առաջինը՝ մենք ներկայանո՞ւմ ենք որպես հակամարտության կողմ, թե ոչ և երկրորդը՝ ի՞նչ հարցերով ենք ներկայանում»,- ասաց Ալեքսանդ Մանասյանը և կարևորեց, որ այդ նույն սեղանի շուրջ պետք է բարձրաձայնվի նաև Նախիջևանի հարցը»,- նշեց նա։
Քաղաքագետը հիշեցրեց, որ Հայաստանի նախորդ նախագահները միջազգային ամբիոններից հայտարարում էին, որ Արցախի ճանաչումը Ադրբեջանի տարածքային ամբողջականության հետ ոչ մի կապ չունի։
Նրա կարծիքով` դա լավ բանաձև է, ինչպես նաև հայտարարությունն այն մասին, որ Հայաստանը կընդունի Ստեփանակերտի ցանկացած որոշումը։
Այդ տեսակետից Ադրբեջանն ինչ-որ իմաստով օգնում է Հայաստանին` սրելով իրավիճակը Նախիջևանում։
Մի կողմից` ադրբեջանական կողմն ուզում է այնպես անել, որ Երևանը շարունակի բանակցությունները Ստեփանակերտի անունից, մյուս կողմից էլ` Հայաստանին հնարավորություն է տալիս սահմանափակել բանակցությունները Նախիջևանի իրավիճակով։
«Բաքուն Նախիջևանի թեմայով օգնում է մեզ։ Հայաստանը կարող է հենց այդ մասին բանակցություններ վարել», — ասաց Մանասյանը։
Նա կարծում է, որ դիվանագետները պետք է Նախիջևանի պատկանելության ու կարգավիճակի հարցը բարձրացնելու հնարավորություն գտնեն, քանի որ այն միայն որպես պրոտեկտորատ է Ադրբեջանին փոխանցվել։
Հիշեցնենք, որ հունիսի 30-ի երեկոյան և հուլիսի 1-ի առավոտյան ադրբեջանական զինված ուժերի ստորաբաժանումները նախիջևանյան ուղղության որոշ տեղամասերում փորձել էին դիրքային ամրապնդման ինժեներական աշխատանքներ իրականացնել։ Դրան ի պատասխան, ՀՀ զինված ուժերը պատասխան կրակ էին արձակել` թույլ չտալով, որ հակառակորդը կատարի իր խնդիրը: Հայաստանի զինված ուժերի արձակած կրակից ամբողջությամբ ավերվել ու այրվել էր հակառակորդի դիրքերից մեկը: