ԵՐԵՎԱՆ, 5 հուլիսի — Sputnik. Ռուսաստանի խոշորագույն տուրօպերատորներից մեկը` «Նատալի Տուրսը», դադարել է ուղեգրեր վաճառել։ Այս մասին ՌԻԱ Նովոստիին է հայտնել տուրօպերատորի համասեփականատեր և նախագահ Վլադիմիր Վորոբյովը։
Ընկերությունն արդեն սկսել է չկայացած ուղևորությունների համար զբոսաշրջիկներին փոխհատուցում վճարել։ Միևնույն ժամանակ, ինչպես հայտնել է Վորոբյովը, «Նատալի Տուրսի» հաճախորդները Թուրքիայում «բռնության» և շորթման դեպքերի են բախվել։
Ընկերությունում դադարեցրել են տոմսերի վաճառքն ու չեղյալ հայտարարել մինչև սեպտեմբերի 30-ը հաստատած տուրերը։
«Նատալի Տուրսը» խոստացել է, որ մինչև շաբաթվա վերջ ընկերությունը հանգստացողներին դուրս կբերի Իսպանիայից։ Միևնույն ժամանակ տեղեկություն է ստացվել, որ ընկերության հաճախորդները խնդիրներ են ունեցել Թուրքիայում և Կուբայում։
Չորեքշաբթի «Նատալի Տուրս» ընկերությունը հայտնել է, որ իր կառույցը` «Պանորամա Տուր» ՍՊԸ-ն, չեղարկում է 2018 թվականի հուլիսի 4-ից սեպտեմբերի 30-ն (ներառյալ) ընկած ժամանակահատվածի զբոսաշրջային ուղևորությունները։ «Պանորամա տուրը» հունիսի 30-ից զբոսաշրջիկների համար դադարեցրել է դեպի Բարսելոնա, Ռիմինի, Կատանիա, Նեապոլ, Անթալիա և Հերակլեոն իրականացվող չարտերային ծրագրերը։
«Նատալի Տուրս» տուրօպերատորը հիմնադրվել է 1992 թվականին, սեփականատերերն են Վլադիմիր և Նատալյա Վորոբյովները։ 2000-ականներին ընկերությունը Ռուսաստանի խոշորագույն զբոսաշրջային օպերատորներից մեկն էր, սպասարկման հիմնական ուղղությունն Իսպանիան էր։