ԵՐԵՎԱՆ, 5 հուլիսի — Sputnik. Հայ նկարիչը Երուսաղեմի պատմությունից վերցրած թղթե և ալյումինե կերպարներ է ստեղծում, հայտնում է Times of Israel-ը։
Իր ժամանակավոր արվեստանոցում Կարեն Սարգսյանը պատմական ֆիգուրների վառ հավաքածու ունի։ Այնտեղ կարելի է գտնել Դավիթ արքայի, Սողոմոն թագավորի, Պարսից արքա Կյուրոս Մեծի, Երուսաղեմի խաչակիրների թագուհի Մելիսենդայի, Սուլեյման Առաջինի և Աննա Տիխոյի արձանիկները։ Բոլոր այս մարդիկ մեծ ազդեցություն են թողել Երուսաղեմի վրա։
«Հրեաների պատմությունն ու պատմությունը չեմ տարանջատել։ Այս մարդիկ համընդհանուր պատմության մի մասն են դարձել», — ասել է Սարգսյանը։
Շուտով նրա գործերը կտեղափոխվեն ժամանակավոր «կացարան»` «Դավթի աշտարակի» թանգարան, և կցուցադրվեն «Քար, թուղթ, մկրատ» ցուցահանդեսի շրջանակում, որը կբացվի հուլիսի 8-ին։
Սարգսյանը հոլանդահայ նկարիչ է, որը հայտնի է իր համարձակ ու արտասովոր քանդակներով։
Արվեստագետի ուրույն ոճը մշակվել է Ամստերդամի (ուր Սարգսյանը տեղափոխվել է ընտանիքի հետ) հայտնի Rijksakademie գեղարվեստի դպրոցում սովորելու տարիներին։ Իր տեխնիկան նա վերագրում է բռնցքամարտիկի վաղեմի փորձին և քոլեջի տարիներին, երբ անատոմիայի դասընթացներ է անցել և կարողացել է հասկանալ, թե ինչպես է շարժվում մարմինը։
Առաջին անգամ նա սկսել է թղթով աշխատել ավելի քան 20 տարի առաջ։ Այդ ժամանակից ի վեր Սարգսյանը ներկայացել է միջազգային ասպարեզում, այդ թվում` Լոնդոնի Tate Moder-ում և Պոմպիդու կենտրոնում։
«Սարգսյանի նոր աշխատանքները, որոնք ստեղծվել են հատուկ այդ ցուցահանդեսի համար, Երուսաղեմի պատմական կերպարների բացառիկ, ժամանակակից մեկնաբանություններ են», — ասել է «Դավթի աշտարակ» թանգարանի ղեկավար և գլխավոր պահապան Էյլաթ Լիբերը։
Սարգսյանը կնոջ հետ Երուսաղեմ է ժամանել երեք ամիս առաջ։ Նրանք 100 կգ ալյումին և ավելի քան 2500 դանակ են տարել իրենց հետ` ծրագրելով 9 աշխատանք ստեղծել մինչև հուլիսյան ցուցահանդեսի բացումը։