ԵՐԵՎԱՆ, 5 հուլիսի — Sputnik. ՀՀ առաջին փոխվարչապետ Արարատ Միրզոյանը չի բացառում, որ վաղը ձերբակալվի կոռուպցիայի հետ կապ ունեցող իրենց որևէ կուսակից։ Այս մասին նա ասաց այսօր, լրագրողների հետ զրույցում` անդրադառնալով հնչող այն գնահատականներին, թե բոլոր բացահայտումները վերաբերում են միայն ՀՀԿ–ականներին։
«Այն մարդիկ, ովքեր թալանել են, պաշտոնյաներ են եղել և ՀՀԿ–ականներ են եղել։ Մենք մեղավո՞ր ենք դրանում։ Հիմա կարող է վաղը որևէ ՔՊ–ական ձերբակալվի, որն ինչ–որ թալան է իրականացրել, բայց մի քիչ կասկածում եմ, քանի որ ՔՊ–ականները նման ռեսուրսներ չեն ունեցել»,– ասաց նա` վստահեցնելով, որ պատասխան տալու են բոլոր թալանչիները` անկախ կուսակցական պատկանելությունից։
Այդուհանդերձ, Արարատ Միրզոյանը չի բացառում, որ առաջիկայում նոր բացահայտումներ կլինեն։
Ինչ վերաբերում է հուլիսի 3-ին Սերժ Սարգսյանի եղբոր` Ալեքսանդր Սարգսյանի տանն իրականացված օպերատիվ գործողություններին ու Ալեքսանդր Սարգսյանի գտնվելու վայրին ու կարգավիճակին, Արարատ Միրզոյանը հրաժարվեց պատասխանել` խորհուրդ տալով սպասել իրավապահների հայտարարություններին։