ԵՐԵՎԱՆ, 4 հուլիսի — Sputnik. Բացահայտումների ալիքը շրջվում է դեպի հակառակ ափը։ «Հայաստան» համահայկական հիմնադրամի տնօրեն Արա Վարդանյանի փաստաբանը ֆեյսբուքյան իր էջի միջոցով տեղեկացնում է, որ վատնման կամ յուրացման որևէ փաստ առկա չէ։
«Հիմնադրամի անվամբ բացված վարկային գծի բանկային քարտից կատարել են վճարումներ, այդ թվում Ա.Վարդանյանի անձնական կարիքների համար, որոնք սահմանված ժամկետում (օրերի ընթացքում) իր իսկ միջոցներից վերադարձվել են հիմնադրամի բանկային հաշվին, ու ոչ հիմա, այլ հենց ընթացքում»,–գրել է փաստաբանը։
Ըստ նրա` արդյունքում «Հայաստան» համահայկական հիմնադրամին կամ այն բանկին, որի միջոցներն են օգտագործվել, պատճառվել է 0 դրամի նյութական վնաս, անձնական կարիքների համար ծախսվել է սփյուռքահայերի հավաքած գումարներից 0 դրամ։
«Իսկ թե ինչքան վնաս պատճառեցին երեկվա հաղորդագրությունները Հայաստան համահայկական հիմնադրամին, դատեք ինքներդ»,– ամփոփել է Վարոսյան։
Հիշեցնենք, որ հուլիսի 3–ին ԱԱԾ–ն տեղեկություն տարածեց, որ ձերբակալվել է «Հայաստան» համահայկական հիմնադրամի տնօրեն Արա Վարդանյանը։ Փաստական հանգամանքների ճնշման ներքո Վարդանյանը խոստովանել էր, որ տնօրինելով հիմնադրամին տրամադրված 25 միլիոն դրամի վարկային գծով բանկային քարտը, դրա միջոցներն օգտագործել է անձնական նպատակներով, այդ թվում դրանք ուղղելով տարբեր առցանց խաղատներում խաղադրույքներ կատարելուն։