Թուրքիայի քաղաքական կուլիսներում խոսվում է, որ նախագահ Ռեջեփ Թայիփ Էրդողանը նոր կառավարությունում պաշտոն կառաջարկի աշխարհահռչակ տնտեսագետ Տարոն Աճեմօղլուին: Նա կարող է Աճեմօղլուին առաջարկել ղեկավարել Թուրքիայի տնտեսությունը։
Թուրքագետ Հակոբ Չաքրյանը կարծում է, որ Աճեմօղլուի հայ լինելն Էրդողանին չի վնասի։ Հակառակը` կբարձրացնի նրա հեղինակությունը, քանի որ հայտնի բան է ` Էրդողանը տարբեր սանձարձակություններ է անում ԱՄՆ-ի ու Եվրամիության հանդեպ, հետո էլ նրան բռնապետ լինելու մեջ են մեղադրում։
Ըստ փորձագետի` Աճեմօղլուին նախարար նշանակելու դեպքում Էրդողանը ցույց կտա, որ ինքն այնքան էլ բռնապետ չէ, կարողանում է իր կառավարության կարևորագույն պաշտոններից մեկը հանձնել Աճեմօղլուին։ Չաքրյանը կարծում է, որ դա միայն պլյուս կլինի Էրդողանին։
«Բայց կասկածում եմ, որ Աճեմօղլուն կընդունի Էրդողանի առաջարկը։ Նա պաշտոնի կարիք չունի։ Եթե Աճեմօղլուն այժմ աշխատում է Համաշխարհային բանկում, դա ավելի կարևոր է, քան Թուրքիայում որևէ պաշտոն ստանձնելը։ Հատկապես Էրդողանի հետ աշխատելը ծանր գործ է և ռիսկեր է պարունակում»,- ասաց Չաքրյանը։
Նշենք, որ Հայաստանի վարչապետ Նիկոլ Փաշինյանը դեռ մայիսի 12-ին դիմել էր հայտնի տնտեսագետին՝ առաջարկելով գալ Երևան և օգնել վերականգնել երկրի տնտեսությունը։
Աճեմօղլուն այդ ժամանակ պատասխանել էր, որ շատ է ուզում գալ Հայաստան, բայց դժվարանում է կոնկրետ ժամկետներ ասել անձնական բնույթի խնդիրների պատճառով։ Միաժամանակ նա խոստացել է ջանքեր գործադրել՝ երկրին օգնելու համար։
Հիշեցնենք, որ «Ինչու են որոշ երկրներ հարուստ, մյուսները աղքատ» բեսթսելերի հեղինակ Դարոն Աճեմօղլուն մեծացել է ստամբուլահայերի ընտանիքում։