.JPG){kind=link}
ԵՐԵՎԱՆ, 2 հուլիսի — Sputnik. Թթի փառատոնը կկայանա Սյունիքի մարզի Քարահունջ գյուղում հուլիսի 7-ին։ Թթի տոնը կօգնի հյուրերին ավելի լավ ճանաչել Հայաստանը։ Այս մասին այսօր լրագրողներին ասաց Հայաստանի Զբոսաշրջության պետական կոմիտեի փոխնախագահ Մեխակ Ապրեսյանը։
Ապրեսյանի կարծիքով` նման փառատոների նպատակը միայն զբոսաշրջությունը զարգացնելը չէ։
«Դա հզոր գործիք է բազմաթիվ հարցեր լուծելու համար։ Առաջին հերթին` հանրապետության գյուղերում այդ միջոցառումները կօգնեն պահպանել մեր նախնիների ավանդույթները, երկրորդ` դրանք աջակցում են սահմանամերձ գյուղերի զարգացմանը», — նշեց Ապրեսյանը։
Բացի այդ, նման փառատոների ժամանակ գյուղացիները և արտադրողներն իրենց արտադրանքը ներկայացնելու հնարավորություն ունեն։
Թթի փառատոնը կդառնա այն հարթակներից մեկը, որտեղ կարելի է օգտակար և նոր ծանոթություններ ձեռք բերել։
«Փառատոնը կմեկնարկի թթի ծառը թափ տալով։ Այն թիմը, որն ավելի շատ թութ կհավաքի, հաղթող կդառնա», — նշեց «Արենի փառատոն» հիմնադրամի տնօրեն Նունե Մանուկյանը։
Բացի այդ, ծրագրված են տարբեր տոնական միջոցառումներ, որոնք կավարտվեն հուլիսի 8-ին։
Նա ավելացրեց, որ միջոցառման շրջանակում կպատրաստվի և կներկայացվի հայտնի թթի օղին։
Թթի փառատոնն անցկացվում է արդեն չորրորդ անգամ։ Այս տարի միջոցառման շրջանակում հյուրերը կծանոթանան Քարահունջ գյուղի բնակիչների ավանդույթներին, կհամտեսեն օգտակար հատապտուղներ, թթի օղի, դոշաբ (բուժիչ օշարակ), ինչպես նաև կկարողանան համտեսել ազգային խոհանոցի ճաշատեսակները` Քարահունջի ձկան հարիսան, խաշիլը, թանապուրը։
Տոնի ժամանակ խոհարարները վարպետության դասեր կկազմակերպեն փառատոնի այցելուների համար։ Փառատոնի հյուրերը կարող են գնել չրեր, մուրաբա և այլն։